Sánchez obtería o mellor resultado dos últimos 5 anos para o PSOE tras o seu anuncio, segundo o CIS
O Centro de Investigacións Sociolóxicas (CIS) sitúa ao PSOE case dez puntos por encima do PP, cunha estimación de voto do 38,6 % dos socialistas e 29,2 % para os 'populares'. Pola súa banda, o BNG mantense cun 0,9 % da estimación de voto con respecto ao anterior barómetro.
Por Europa Press / Redacción | Santiago de Compostela | 29/04/2024 | Actualizada ás 16:17
O Centro de Investigacións Sociolóxicas (CIS) sitúa ao PSOE case dez puntos por encima do PP tras o anuncio do presidente Pedro Sánchez de abrir un período de reflexión para decidir sobre o seu futuro, cunha estimación de voto do 38,6 % dos socialistas e 29,2 % para os 'populares'. Pola súa banda, o BNG mantense cun 0,9 % da estimación de voto con respecto ao anterior barómetro.
Tras anunciarse o período de reflexión, o presidente do CIS, o sociólogo socialista José Félix Tezanos, decidiu pór en marcha o operativo do organismo público para realizar unha sondaxe flash sobre esa decisión de Pedro Sánchez, todo iso cando España está en pleno período electoral polos comicios europeos do 9 de xuño.
Segundo indica o organismo público, a sondaxe baséase en 1.809 entrevistas telefónicas realizadas o pasado venres, unha mostra que é algo menos da metade que nun barómetro mensual. Iso si, predominan os votantes socialistas entre os enquisados, xa que segundo o seu recordo de voto, as últimas xerais gañounas o PSOE con oito puntos de vantaxe, cando en realidade a vitoria foi do PP, dous puntos por encima dos socialistas.
DÁSE A VOLTA EN DÚAS SEMANAS
Se a principios de abril o CIS situaba ao PP un punto por encima do PSOE no seu barómetro mensual, neste sondeo flash tras o anuncio de Sánchez a situación deuse a volta. Segundo a súa estimación de voto, o PSOE conta agora cun respaldo do 38,6 %, unha porcentaxe que Sánchez non tivo nos últimos cinco anos e que supera con fartura o 31,7 % das últimas xerais.
E mentres o PSOE se dispara, o CIS outorga ao PP unha estimación de voto do 29,2 %, catro puntos menos que o mes anterior e tamén por baixo do 33 % co que gañou as xerais de xullo de 2023. Iso fai que a diferenza entre os dous grandes partidos sexa agora de 9,4 puntos a favor do PSOE, unha distancia que non se vía desde primavera de 2021.
VOX AFIÁNZASE NA TERCEIRA PRAZA
E, mentres tanto, Vox segue asentado na terceira praza, agora cunha estimación de voto do 11 %, mentres que Sumar mantén o seu declive e, segundo o CIS, xa está nun 7,2 %, o seu peor rexistro. Podemos, pola súa banda, mantén unha estimación de voto do 2,4 %. O PSOE tamén gaña en intención directa de voto, pois un 24,2 % asegura que votaría o PSOE se as eleccións fosen mañá mesmo, fronte a un 15,9 % que apoiaría ao PP. Iso si, ante esta pregunta directa hai un 19 % que non sabe que responder e un 6 % que prefire non contestar.
