O director de HOTUSA, Amancio López, novo presidente da Asociación de Empresarios Galegos de Cataluña

A Asociación de Empresarios Galegos de Cataluña (AEGA-CAT) elixiu como novo presidente a Amancio López Seijas, de Grupo Hotusa, de forma que sucede a Carlos Fernández (Filmax), quen exerceu o cargo desde 2019. Amancio López, que ata agora ocupara o cargo de vicepresidente, pasa a liderar a asociación fundada en 1989 durante os próximos cinco anos.

Ao mesmo tempo, a asemblea de AEGA-CAT renovou tamén o resto da xunta directiva, a cal estará composta por catro vicepresidentes, unha secretaria xeral e seis vocais.

Destaca a incorporación de dúas novas caras na vicepresidencia: o propio Carlos Fernández e Xosé Carlos García (Xuntanza de Catalunya). Doutra banda, José Antonio Castro (Hesperia) e Francisco Cabanas (Pago de Ina) foron reelixidos no cargo. Pola súa banda, Carmen López mantén tamén o seu posto como secretaria xeral da entidade.

"É unha honra asumir a presidencia da Asociación de Empresarios Galegos de Cataluña, unha entidade cunha historia significativa na promoción e defensa dos intereses empresariais da comunidade galega en Cataluña", asegura Amancio López.

"Agradezo a confianza depositada en min e comprométome a traballar para continuar fortalecendo os lazos entre os nosos asociados, impulsando a innovación e creando oportunidades para o crecemento e desenvolvemento dos nosos negocios. Quero dar persoalmente as grazas a Carlos polo magnífico labor que levou a cabo durante o últimos cinco anos. En diante, traballaremos para seguir construíndo un futuro prometedor para AEGA-CAT, para todos os seus membros e para toda a comunidade galega en Cataluña", expresou o novo presidente.

Amancio López Seijas, HOTUSA