O exministro de Sanidade tacha de "irresponsable e perigosa" a "ocorrencia" da Xunta de "substituír a médicos por MIR"

O secretario de Sanidade e Saúde do PSdeG, José Miñones, cualificou este martes de "irresponsable e perigoso" o intento do Goberno galego de tapar as vacantes de médicos con persoas en formación sen supervisión durante os meses de verán. O exministro de Sanidade advirte que "se non fóra pola gravidade ata sería gracioso" o que limita á "nova ocorrencia do día" que, na súa opinión, dá mostra da "incapacidade e improvisación" deste goberno.

Miñones advirte que as declaracións do presidente da Xunta, Alfonso Rueda, defendendo a pretensión de "reducir tempo de formación do MIR polo que é unha falta de programación do goberno", despois de que o Ministerio de sanidade rexeitase a proposta "é algo que non esperaban escoitar nunca".

O socialista avisa de que a proposta de Rueda "non só é negativa para os pacientes, senón tamén para os MIR, aos que carga dunha responsabilidade que non teñen por que asumir". Así, esixiu á Xunta que "deixe de tapar erros con máis irresponsabilidade" e que "dunha vez asuma a súa competencia en materia sanitaria, incrementando o orzamento para sanidade e dotando ao MIR de maior remuneración ata chegar ás contías medias que se abonan no resto de España".

O exministro explica que os médicos internos residentes, por moito que sexan os de último ano, "non deixan de ser persoal en formación". Ademais, advirte que "a ninguén se lle podería pasar pola cabeza que os alumnos pasen a exercer o traballo para o que precisamente se están formando, e ademais sen a debida supervisión", polo que reclamou ao presidente da Xunta que "deixe de improvisar coa sanidade e a saúde dos galegos e das galegas" e escoite aos profesionais sanitarios que a semana pasada censuraron esa "ocorrencia".

José Miñones, no Congreso dos Deputados, a 16 de novembro de 2023, en Madrid | Fonte: Eduardo Parra - Arquivo