Salvamento defende que actuou "correctamente" cos pélets e que Galicia ten "leccións aprendidas" polo Prestige
Cre que o mar é un "sector duro, pero de futuro": "Non se van a poder evitar nunca o 100% dos incidentes"
Por Europa Press / Redacción | Santiago de Compostela | 15/06/2024 | Actualizada ás 12:39
O director xeral da Mariña Mercante e presidente de Salvamento Marítimo, Gustavo Santana, defendeu que tanto a administración marítima como o armador actuaron de forma "correcta" na crise dos pélets vivida en Galicia a principios deste ano, reivindicando que a Comunidade ten "leccións aprendidas" tras o Prestige.
Nunha entrevista concedida a Europa Press, no marco da presentación en Baiona da Campaña de Verán de Seguridade na Náutica de Recreo, Santana puxo en valor o traballo do organismo durante o incidente cos pélets, subliñando que se aplicaron as directrices da Organización Marítima Internacional (OMI), que recomendaba a actuación en costa, xa que é "moi difícil" buscar este tipo de materiais no mar.
A pesar de todo, destacou que Salvamento Marítimo realizou voos para tratar de detectar os pélets desde o aire, cunha coordinación interna "excelente". Preguntado polo conflito entre Xunta e Goberno sobre canto tardou o Executivo central en dar aviso á Administración autonómica, el insistiu en que a Xunta "non pode dicir que non coñecese nese momento" o problema, xa que tamén alertou do asunto. "Pero bueno, o episodio xa pasou. Está a realizarse unha reclamación de danos ao armador. Eles mesmos instaron a recollida en costa e, dentro dun incidente que nunca apetece que suceda, actuouse por parte do armador e da administración marítima de forma correcta", sentenciou.
PITANXO
Outro dos temas tratados durante a entrevista foi o naufraxio do pesqueiro galego 'Vila de Pitanxo', que acabou coa vida de 21 dos 24 mariñeiros a bordo. Gustavo Santana lembrou que o mar é un medio "hostil", pero destacou que tras o devandito afundimento levouse a cabo unha investigación para saber que tipo de medidas é necesario implementar para evitar sucesos deste tipo. El insistiu en que cada vez que ocorre unha desgraza así se revisan os aspectos de seguridade e búscanse melloras continuas, indicando que no apartado de seguridade "nunca se chegará ao cume". "Non se van a poder evitar nunca o 100% dos incidentes", apostilou.
Sobre a investigación xudicial iniciada tras o naufraxio, só dixo que a súa Dirección Xeral ofrece a súa "máxima colaboración" para tentar que algo así non volva pasar. "A verdade é que o lamento moito", sentenciou. Con todo, animou aos mozos a apostar polo sector do mar como medio de vida. "É un sector duro, pero de futuro", dixo.
