O PP provincial da Coruña convoca congreso en Ribeira, Lousame e Teo para o mes de xullo
Os resultados logrados nas últimas xerais, autonómicas e europeas "ratifican" que o PP "é a opción maioritaria cada vez que os veciños acoden a unha cita coas urnas"
Por E.P. | A CORUÑA | 18/06/2024 | Actualizada ás 20:52
O presidente do Partido Popular na provincia da Coruña, Diego Calvo, proclamou este martes que a análise dos datos dos procesos electorais celebrados no último ano auguran "un cambio seguro" no goberno da Deputación da Coruña e nos dos concellos da Coruña e de Santiago de Compostela.
Acompañado polo secretario xeral dos populares, Evaristo Ben, Calvo aproveitou a Xunta Directiva provincial que a formación popular celebrou este martes para subliñar que os resultados logrados polo seu partido nas últimas xerais, autonómicas e europeas ratifican que o PP "é a opción maioritaria cada vez que os veciños acoden a unha cita coas urnas".
Con máis dun 42% do voto nas últimas europeas, os populares superaron en máis de 80.000 votos aos socialistas e en máis de 120.000 ao BNG. Ademais, destacou Calvo, o PP "gañou en 92 dos 93 concellos da provincia, conseguindo 30.000 votos máis que os alcanzados nas europeas do 2019". "En 41 dos 93 concellos superamos o 50% dos votos, e só en 16 baixamos do 40%", agregou.
REESTRUTURACIÓN DA CORUÑA
Sobre A Coruña, Calvo aludiu á última "reestruturación" anunciada pola alcaldesa, Inés Rey, e que na súa opinión, o único que confirma é "o desgoberno interno" no que viven os socialistas, "máis preocupados, dixo, de apagar lumes que de xestionar a cidade".
Finalmente, neste camiño por seguir preparando á súa formación para os seguintes retos, a Xunta Directiva provincial aprobou a celebración dos próximos congresos locais en Lousame, Ribeira e Teo, os días 15, 17 e 18 de xullo.
Consciente de que aínda hai moito traballo por facer para alcanzar os gobernos da Deputación e do tres urbes, Calvo felicitou a todas aquelas persoas que "traballaron moi duro durante o último ano para conseguir que a provincia da Coruña responda con rotundidade cada vez que ten unha cita coas urnas".
