Galicia, sexta comunidade que máis fondos europeos recibiu o pasado ano: 310 millóns de euros
A Comunidade galega recibiu 1.529 millóns desde que se puxo en marcha o Mecanismo de Recuperación, en sétimo lugar.
Por Europa Press / Redacción | MADRID | 07/07/2024 | Actualizada ás 12:41
Cataluña foi a comunidade autónoma de réxime común que máis fondos europeos recibiu en 2023, 924 millóns de euros, mentres que Galicia sitúase no sexto lugar do ranking, con 310 millóns, segundo o Informe Comunidades Autónomas 2023, realizado con datos do Goberno. O informe, elaborado polo Observatorio de Dereito Público e recolleito por Europa Press, mostra que a Cataluña lle seguen Andalucía e Madrid, con 815 millóns de euros e 619 millóns, respectivamente.
Tras elas, sitúanse a Comunidade Valenciana, con 506 millóns de euros; Castela e León, con 338; Galicia, con 310 millóns; Castela-A Mancha, con 300; Canarias, con 281 millóns de euros; Aragón, con 195; e Baleares; con 176 millóns de euros. Na parte baixa da táboa sitúanse Murcia, con 171 millóns de euros; Asturias, con 149 millóns; Estremadura, con 141 millóns; Cantabria, con 99 millóns; e, finalmente, A Rioxa, con 92.
Pola súa banda, as comunidades autónomas con réxime especial, País Vasco e Navarra, recibiron 300 millóns de euros e 136, respectivamente. Do seu lado, as cidades autónomas de Ceuta e Melilla recibiron once e dez millóns de euros, respectivamente. O Plan de Recuperación, Transformación e Resiliencia repartiu un total de 5.966 millóns de euros en 2023, segundo recolle o traballo.
ANDALUCÍA, Á CABEZA DO TOTAL
O informe tamén mostra que Andalucía, ao peche de 2023, é a comunidade autónoma de réxime común que máis fondos europeos recibiu desde que o mecanismo se puxo en marcha, un total de 4.077 millóns de euros, seguida de Cataluña e Madrid, con 3.963 millóns e 2.875 millóns, respectivamente. O cuarto e o quinto lugar ocúpano a Comunidade Valencia, con 2.471 millóns, e Canarias, con 1.622 millóns. Séguenlles Castela e León, con 1.621 millóns; Galicia, con 1.529; Baleares, con 1.035; Castela-A Mancha, 1.308 millóns; e Aragón, con 903 millóns de euros. Á cola dos beneficiados sitúanse Estremadura, con 818 millóns de euros; Murcia, con 791 millóns; Asturias, con 638 millóns; Cantabria, con 436; e A Rioxa, con 323 millóns. País Vasco e Navarra recibiron 1.152 millóns de euros e 542 millóns, respectivamente, mentres que Ceuta e Melilla 50 millóns e 47 millóns en total.
O informe pon de relevo que "o elevado volume de recursos canalizados desde a Facenda central cara ás comunidades autónomas constitúe unha política que reforza o seu protagonismo na privisión dos servizos públicos fundamentais do Estado do Benestar en España". Ademais, destaca que esa política expón como "desafío o desenvolvemento dos mecanismos de coordinación e cogobernanza vixentes, nunha perspectiva de feeralismo non soamente fiscal que debe alcanzar a todos os niveis de goberno, desde o espazo local ata a Unión Europea".
