Renfe pon en marcha a partir deste venres dous novos servizos de Avlo no corredor Galicia-Madrid
Por Europa Press / Redacción | SANTIAGO DE COMPOSTELA | 23/01/2025 | Actualizada ás 14:41
Renfe incorpora a partir deste venres dous novos servizos de Avlo con trens S106, con 581 prazas por convoi, para substituír dous Alvia na conexión entre Vigo e Madrid. Segundo informou a compañía nun comunicado, a posta en marcha destes servizos supón unha mellora na oferta comercial de Renfe, con trens con máis do dobre de prazas que os Alvia e con mellores prestacións.
Ademais, incidiu en que supón que máis viaxeiros teñan posibilidade de acceder a este servizo de baixo custo da compañía que parará en todas as estacións de alta velocidade do percorrido.
Así, tras finalizar a campaña do Nadal e pór en circulación dúas Avlo diarios entre Vigo e Madrid e outros dous entre A Coruña e Chamartín, o Avlo que en días alternos comunica Madrid con Vigo e A Coruña deixará de prestar servizo para adaptar a oferta á demanda en época invernal.
O Alvia Madrid-Vigo será substituído por un Avlo diario con saída da capital ás 17.08 horas --antes ás 16.00 horas-- e chegada a Vigo ás 21.37 horas, con parada en todas as estacións intermedias. Pola súa banda, o Alvia Vigo-Madrid substitúese por un servizo Avlo S106 diario con saída de Vigo ás 05.59 horas --antes ás 06.45 horas-- e chegada a Madrid ás 10.34 horas, con parada en todas as estacións intermedias.
