Excarceradas dúas persoas tras unha saída de vía en Narón

Os Bombeiros de Narón tiveron que cortar os asentos traseiros dun vehículo para excarcerar a dúas persoas tras unha saída de vía na AP-9F, en Xubia, sentido Ferrol.

Segundo informou o 112, o suceso produciuse minutos antes das 22.00 horas deste martes e foron varios os particulares que deron a voz de alarma.

No interior do turismo, único implicado, viaxaban dúas persoas que quedaron atrapadas polo que os bombeiros tiveron que cortar os asentos traseiros para poder sacalas.

Un dos feridos foi trasladado ao Hospital Arquitecto Marcide de Ferrol e o outro ocupante, segundo puntualizou a central de emerxencias, as lesións que presentaba eran de menor importancia.

No operativo participaron, ademais dos Bombeiros, os profesionais de Urxencias Sanitarias de Galicia-061, a Garda Civil e a Policía Local.

Excarcerada unha persoa tras envorcar co camión | Fonte: GARDA CIVIL