Buscan a un home tras unha persecución en coche de película entre Ferrol e Narón
Outro dos que viaxaba no coche foi detido.
Por Europa Press / Redacción | Ferrol | 12/08/2024 | Actualizada ás 10:13
Ao longo da mañá deste luns está previsto que pase a disposición xudicial un home que foi detido na madrugada deste domingo, tras protagonizar unha persecución por estradas de Ferrol e Narón, cun vehículo que roubara previamente nun negocio de compravenda situado na parroquia de San Mateo, en Narón.
Todo comezou cando axentes da Policía Nacional, da Comisaria de Ferrol-Narón, tiveron coñecemento deste roubo e trataron de darlle o alto ao vehículo. En lugar de deterse, tanto piloto como copiloto emprenderon a fuxida.
É por iso que os axentes pediron a colaboración das policías locais de Ferrol e Narón, que lograron interceptar nun primeiro momento este vehículo nunha rotonda do polígono industrial de Río do Pozo, en Narón, tras chocar cun vehículo policial e outro automóbil.
Pero o condutor e o seu acompañante, en lugar de quedar no punto, emprenderon a fuxida á carreira, sendo un deles detido horas máis tarde, mentres que o outro, que xa está identificado, aínda segue en busca e captura.
