Ferrol será o epicentro do automobilismo deportivo galego esta fin de semana co seu rallye
O alcalde de Ferrol, José Manuel Rey Varela (PP) agradeceu a colaboración entre as diferentes administracións que fan posible a realización deste evento deportivo
Por E.P. | SANTIAGO DE COMPOSTELA | 20/08/2024 | Actualizada ás 18:11
O alcalde de Ferrol, José Manuel Rey Varela (PP), presidiu este martes a presentación da 55º edición do Rallye desta localidade, organizado pola Escuadra Ferrol co patrocinio do Concello de Ferrol e da Deputación da Coruña. O evento celebrarase os días 23 e 24 de agosto e será puntuable para o Campionato de Galicia de rallyes de asfalto.
Neste acto, celebrado no salón de recepcións do Concello, tamén participaron o presidente da Escuadra Ferrol, Germán Castrillón, o presidente da Deputación da Coruña, Valentín González, o presidente da Federación Galega de Automobilismo, Antonio Rodríguez, a secretaria territorial da Xunta en Ferrol, Patricia Busto, e Fernando Mosquera en representación de Gadisa.
Rey Varela agradeceu a colaboración entre as diferentes administracións que fan posible, tamén, a realización deste evento deportivo, e que vai permitir que durante uns días sexa a capital galega do motor.
"Os pilotos teñen ante si un reto formidable, como demostrar a súa habilidade e destreza ao volante nun percorrido de máis de 112 quilómetros", segundo apuntou o rexedor. Nesta edición inscribíronse 126 equipos que sairán da avenida de Esteiro o venres ás 19,30 horas, o mesmo escenario onde se entregarán os trofeos aos gañadores o sábado sobre as 22.00 horas.
O sábado a saída será ás 8.30 horas desde FIMO. "Como administración debemos impulsar este tipo de citas que, ademais de ser un espectáculo deportivo, contribúen ao posicionamento da Marca Ferrol público goce con seguridade do rallye".
Pola súa banda, Germán Castrillón agradeceu o apoio do Concello, do resto de institucións implicadas e das empresas privadas, así como de todas as forzas de seguridade, voluntarios, Protección Civil e pilotos e afección por contribuír ao mantemento desta cita. "Somos a única proba en España que levamos 55 anos sucesivos celebrándoa", lembrou.
TRAMOS E FAVORITOS
O sábado será o día da competición e ao oito da mañá sairán os participantes desde FIMO, onde durante todo o fin de semana terá lugar a zona de asistencia. Así, durante a mañá realizaranse os tramos de Irixoa-Monfero e Monfero-Monfero, con case 14 quilómetros o primeiro deles e algo máis de catorce o segundo, realizando unha segunda pasada polo tramo por Irixoa-Monfero.
Posteriormente, realizarase o tramo de Ferrol, neste caso situado na zona de Mandía, e logo a especial de San Sadurniño-As Somozas, neste caso con 15 quilómetros, e o tramo das Somozas, con 10 quilómetros.
Seguirán as segundas pasadas por este tres tramos, onde en total o rallye conta con 112 quilómetros cronometrados, dun total de 359. En canto á lista de inscritos, un total de 126 equipos formalizaron a lista de inscritos para estar presentes nesta proba, onde Víctor Senra e José Murado, co Citroën C3 WRC parten como favoritos.
Fronte a eles estarán Daniel Berdomás e Bras Mirón, co Skoda Fabia R5, tamén cun Skoda Fabia Rally2 estarán Alberto Meira e Avelino Martínez, mentres que outro dos equipos a ter en conta serán o de Jorge Pérez e Miriam Beira, co Hyundai i20 R5, ademais da presenza de Alberto Nimo e Mónica Álvarez cun Peugeot 208 T16 R5.
Habitual tamén na proba do Rallye de Ferrol é a presenza de Joan Vinyes e Jordi Mercador, que van estar na liña de saída cun Hyundai i20 N Rally 2. Tamén estará o novo piloto catalán Gil Menbrado e Alejandro López, cun Ford Festa Rally 2, ademais do coruñés Antonio Pérez Orozco e Néstor Casal, que van estar neste caso cun Citroën C3 Rally 2.
