Eloína Injerto, nova directora xerente da FUNGA
Substitúe a Juan José Couce, que recentemente iniciou unha nova etapa como director territorial de Emprego na Coruña.
Por Europa Press / Redacción | SANTIAGO DE COMPOSTELA | 02/09/2024 | Actualizada ás 19:17
O Padroado da Fundación pública galega para o apoio ao exercicio da capacidade xurídica (FUNGA) acordou este luns o nomeamento de Eloína Injerto como nova directora xerente da entidade, en substitución de Juan José Couce, que recentemente iniciou unha nova etapa como director territorial de Emprego na Coruña.
Eloína Injerto, traballadora social, ten experiencia como docente e investigadora, e foi directora territorial da Fundación Juan Soñador en Galicia. É especialista en xestión de organizacións sen ánimo de lucro e ten unha longa traxectoria de voluntariado e servizo público en diferentes municipios de Galicia.
Por outra banda, o Padroado confirmou a creación dun novo equipo multidisciplinar para reforzar a operatividade e especialización da institución, formado por un asesor xurídico, un traballador social e un administrativo. Desde o 2009, a Xunta aumentou nun 50 % o cadro de persoal da FUNGA.
