O 'Black Friday' creará case 6.600 empregos en Galicia, un 14% máis que en 2023
Os perfís máis demandados para esta campaña son empaquetadores, carretilleiros, mozos de almacén, transportistas, dependentes e persoal de atención ao cliente
Por E.P. | SANTIAGO DE COMPOSTELA | 17/10/2024 | Actualizada ás 16:42
Un informe de Randstad prevé que o 'Black Friday' e o 'Cyber Monday 'xerarán 6.595 contratacións en Galicia, un volume que suporá un incremento do 14,1% respecto dos 5.780 contratos que se asinaron en 2023.
Estes contratos céntranse no sector do comercio, a loxística e o transporte para estas datas. Concretamente, Pontevedra será a provincia que máis contratos realizará con 3.245 (+10,4% respecto ao ano anterior); seguida da Coruña, con máis de 2.400 (+15,6%); Lugo, con máis de 500 (+25,9%); e Ourense, con 430 (+22,9%).
"Coa chegada do Black Friday iníciase unha das tempadas máis importantes do ano para o comercio e a loxística. Este período, que tradicionalmente marca o inicio da campaña de compras do Nadal, representa unha oportunidade crave para o crecemento económico, a xeración de emprego e o aumento das vendas para numerosas empresas de todos os sectores", sinala o director rexional de Traballo Temporal da zona Norte en Randstad, Jesús Fernández Lima.
Os perfís máis demandados para esta campaña son empaquetadores, carretilleiros, mozos de almacén, transportistas, dependentes e persoal de atención ao cliente.
A nivel nacional Randstad prevé que se xerarán 117.000 contratacións en España, un 18,2% máis --catro puntos por encima do 14% de Galicia--, respecto dos 98.955 contratos que se asinaron en 2023.
O 67,5% dos contratos asinaranse en transporte e loxística, concretamente case 79.000. Isto supón un crecemento do 26% respecto ao ano anterior. Doutra banda, o sector do comercio representa pouco máis do 32% do peso total de contratacións, con máis de 38.000 empregos (+4,8% respecto ao ano anterior).
