Grave un ciclista atropelado no Bolo

Un ciclista que foi atropelado no Bolo este mércores foi trasladado nun helicóptero medicalizado ao hospital. Segundo informou o 112, foi pouco despois das 17,00 horas cando un particular alertou ao servizo de emerxencias de que acababan de atropelar a un ciclista no quilómetro 1 da OU-0805, en Cambela. Nese momento, o ferido permanecía tendido inconsciente sobre o asfalto.

Os xestores do servizo de atención a emerxencias solicitaron a intervención de Urxencias Sanitarias de Galicia-061, do GES da Veiga, da Garda Civil de Tráfico e dos voluntarios de Protección Civil do Bolo.

Foi nese momento cando os profesionais sanitarios confirmaron que desprazaban o helicóptero medicalizado con base en Ourense, que tomou terra no punto. O seu persoal encargouse de atender ao ferido en primeira instancia.

Pola súa banda, os membros de Protección Civil do Bolo explicaron que o estado do ciclista revestía gravidade e que, finalmente, foi evacuado ao hospital a bordo da aeronave medicalizada.

Accidente de ciclistas. GARDA CIVIL