A Xunta anuncia a creación unha sociedade pública para impulsar a vivenda pública

A conselleira de Vivenda e Planificación de Infraestruturas, María Martínez Allegue, anunciou que a Xunta creará unha sociedade de vivenda pública para "o impulso efectivo de estratexia" neste ámbito. Na súa comparecencia para expor no Parlamento os orzamentos do seu departamento para 2025, Martínez Allegue explicou que esta sociedade: "Vai ser a encargada de construír unha parte da vivenda pública que imos impulsar desde a Xunta de Galicia".

Neste sentido, a conselleira sinala que esta sociedade suporá unha "escisión" da entidade de Xestión do Só de Galicia (Xestur), de forma que se vai a separar a xestión de chan residencial da industrial. O obxectivo é que asuma "a promoción dunha parte das máis de 2.300 vivendas públicas nesta lexislatura", que se suman ás que xa promove o Instituto Galego de Vivenda e Solo (IGVS). Todo iso no que define como unha "partida histórica" de 241 millóns que a Xunta destina a políticas de vivenda e de urbanismo na comunidade galega para 2025.

"Somos conscientes do problema de acceso á vivenda", dixo acerca dunha cuestión que considera "estrutural a nivel nacional" e que se ve "incrementada" pola lei de vivenda do Goberno. Ademais, seguirá coa xestión do bono de aluguer para os mozos, aínda que critica que o Goberno aínda non transferiu 11,4 millóns. Entre outras actuacións, remarca a decisión da Xunta de facer que as vivendas protexidas o sexan "permanentemente". Unha cuestión que contrapón con que co bipartito "10.000 vivendas que eran protexidas quedaron libres".

TERCEIRO MAIOR AUMENTO

O orzamento da Consellería de Vivenda e Planificación de Infraestruturas será de 513 millóns en 2025, un 8 % máis, terceiro maior incremento entre comunidades. Subliña que un 40 % das contas van para vivenda, cunha partida que se triplica para este fin. O obxectivo da Xunta é terminar esta lexislatura con 8.000 vivendas públicas, así como facilitar chan para construír 20.000 protexidas e 5.000 libres. Haberá 100 millóns para a construción de nova vivenda, 20 millóns para o desenvolvemento de chan residencial (para vivenda pública, protexida e libre), así como 7 millóns para rehabilitación co programa Rexurbe (con 65 actuacións). Expón que o Instituto Galego de Vivenda e Solo (IGVS) contará con 221,3 millóns en 2025, o que supón unha subida de 55 millóns respecto ao ano anterior.

Lembra que actualmente están en marcha 1.500 vivendas de promoción pública, das que case a metade están en fase de construción. A estas súmanse 143 vivendas que van comprar cun investimento de case 8 millóns, ademais de 256 que están en construción por cooperativa en terreos propiedade da Xunta. O Goberno autonómico inclúe unha "batería" de medidas na lei de acompañamento para axilizar vivenda ata finais de 2028, ademais de bonificacións para mozas. A Consellería convocará ao longo do ano do fondo de cooperación para rehabilitación, co que se porá a disposición dos municipios un orzamento de 10 millóns.

INFRAESTRUTURAS

Por outra banda, a conselleira referiuse aos 265 millóns que se destinarán a infraestruturas, dos que 63 millóns serán para incrementar as vías de alta capacidade. Porá en servizo o tramo entre A Ramallosa e a AC-241 da autovía Santiago-A Estrada e licitará o seguinte tramo ata O Rolo; multiplicará por cinco o orzamento destinado á autovía Tui-A Guarda, con 9 millóns; e por catro a dotación para a prolongación da autovía da Costa da Morte, con 8 millóns.

Tamén se avanzará na conversión en autovía do corredor Brión-Noia, cun investimento de 4 millóns; e da VAC Nadela - Sarria, con 2 millóns. Xunto a isto, rescatarase a concesión de catro das autovías de peaxe en sombra: O Salnés, Barbanza, Ourense-Celanova e Santiago-Brión, que desde o 1 de xaneiro de 2025 pasarán a ser de xestión pública. Cifra o aforro da actuación en 330 millóns.

CRÍTICAS DA OPOSICIÓN

A deputada do BNG Alexandra Fernández tacha de "pura fantasía" estas contas, cun "batiburrillo" de cifras e promesas que se fan "unha e outra vez coma se non nada pasase". "Absolutamente imposible tomarse en serio nada do que dixo vostede", recrimina. E é que tacha estes orzamentos de "ciencia ficción" despois de que o ano pasado só se executase o 59 % dos fondos de vivenda, con só 14 vivendas de promoción pública terminadas no exercicio, sostén. Ademais, carga contra o "espolio" de "pagar de máis" polo rescate de autovías tras un modelo público-privado do que é "especialmente responsable" Alberto Núñez Feijóo como presidente da Xunta.

O deputado socialista Carlos López Font censura a falta de "credibilidade" da Xunta en materia de vivenda e reproba que "non dá resposta" ás demandas existentes nesta materia, con 18.000 demandantes de vivenda en Galicia. Sostén que coa actualización do IPC en 2025 haberá 72 millóns menos que o que se destinaba a vivenda co bipartito en 2009. Nesta liña, reprocha que a Xunta prefire "regalar" 300 millóns ao rescate de catro autovías polas que os galegos "non pagan un euro" a quitar as peaxes das autovías AG-55 e AG-57, que incrementan as súas tarifas para 2025.

Armando Ojea (Democracia Ourensana) reduciu a "un brinde ao sol" o que presentou a conselleira. "Está a contar todo tan bonito que eu quero vivir aí", ironizou. En cambio, a deputada popular María Deza defendeu estes orzamentos da Consellería e acusa á oposición de estar "sempre co mesmo mensaxe gris". Na súa quenda de réplica, a conselleira defendeu unha conxelación de tarifas das autovías autonómicas e di que "tan só" se aplica "a subida de IPC deste ano".

MEDIOAMBIENTE

Por outra banda, a conselleira de Medio Ambiente, Ángeles Vázquez, anunciou que a Xunta prevé aprobar en 2025 a lei do clima de Galicia, e sacará a consulta pública este mes de novembro as directrices de ordenación do litoral. Foron dúas cuestións que deu a coñecer Vázquez durante a súa presentación en comisión parlamentaria das contas do departamento autonómico para o ano que vén, as que máis crecen entre as consellerías, un 10 %, ata chegar case aos 490 millóns de euros. Uns orzamentos que conteñen partidas para a conservación e protección da biodiversidade e o coidado da paisaxe, as augas e os animais, entre outras cuestións, pero que tamén están centradas no impulso de pactos, redes, alianzas, marcas, foros e comisións, entre outras actuacións deste tenor relacionadas na súa maioría coa loita contra o cambio climático.