En Marea subiría en votos e mantería escanos
Unha enquisa de NCC Report debuxa un panorama moi similar ao do 20D, no caso de repetirse as eleccións xerais.
Por Galicia Confidencial | Madrid | 25/01/2016 | Actualizada ás 13:05
En Marea lograría seis escanos no Congreso no caso de volver a convocarse as eleccións xerais. Esta é a conclusión máis clara que para Galicia pode tirarse da enquisa que publica hoxe La Razón.
O diario conservador dálle a coalición de esquerdas galega o 1,7% dos sufraxios a nivel estatal. Esta cifra supón un lixeiro avance para En Marea respecto ao 20D, cando lograra o 1,63% deses votos.
Dado que a consultora NCC Report non desagrega datos por autonomías, non se poden saber os posíbeis resultados de PPdeG, PSdeG e Ciudadanos en Galicia. Agora ben, o feito que Nós Candidatura Galega apareza sen ningún deputado adxudicado, indicaría que a coalición que liderou o BNG volvería a non superar a barreira do 5% en ningunha das provincias.
A nivel estatal, avanzarían PP e Podemos, pero non dabondo para desequilibrar o complicado taboleiro actual. Nin a suma dos de Mariano Rajoy con Ciudadanos nin a de Podemos e as súas confluencias serían dabondo para gobernar sen o apoio do PSOE. E viceversa, o PSOE volvería a necesitar a Podemos e a súas confluencias para superar un eventual veto do PP.
Os socialistas (entre dous e catro escanos menos) e os de Albert Rivera (entre sete e dez escanos menos) serían os prexudicados polo lixeiro avance do partido de Pablo Iglesias (entre 1 e catro representantes máis) e o progreso tamén feble dos de Mariano Rajoy (entre 7 e 9 escanos).
En definitiva, como era de agardar, repetir os comicios non serviría, cando menos por si só, para para aclarar o rebumbio no que continúa enleada a política estatal.
