A misteriosa inscrición da Ermida do Monte Pindo
Aparecen novos restos da inscrición que a Asociación Monte Pindo Parque Natural deu a coñecer en 2011 dunha capela da que xa se ten constancia no 830.
Por Galicia Confidencial | Carnota | 05/02/2016 | Actualizada ás 11:59
O Monte Pindo non para de revelar os seus segredos ocultos. O último, o descubrimento de novas inscricións na antiga ermida que ser erixe aos pes da Moa, no curuto do monte. Esta inscrición xa fora dada a coñecer pola Asociación Monte Pindo Parque Natural en 2011, pero agora, apareceron novos restos ocultos tras a actuación nela dun particular que está sendo moi criticada nas redes sociais.
Xa entón, os investigadores non se puxeron de acordo sobre se a lenda descuberta nunha pedra podería tratarse da inscrición fundacional da capela do Monte Pindo ou ben dunha posterior remodelación. A alusión máis antiga dunha edificación relixiosa no Monte Pindo data do ano 830. Durante o seu reinado, Afonso II de Oviedo (rei de Galicia) encomendoulle ao Abade Tructinio unha relación das igrexas do seu reino. Neste documento aparece “in Carnota ecclesia Pintani in Sentes”: A igrexa da Moa.
Moitos rexistros da época tamén testemuñan o papel do Monte Pindo: “In Carinota cum suo monte sacro” (Celanova, 942) tamén deixa lugar a poucas dúbidas: non só aparece nos documentos relixiosos da época, senón que xa se referían a el como montaña sagrada.
