A oposición critica ao PPdeG por "enmendar" os seus propios orzamentos para 2025
Pontón e Besteiro reprochan a modificación na retramitación de parques eólicos e as medidas en materia de vivenda
Por Europa Press / Redacción | SANTIAGO DE COMPOSTELA | 17/11/2024 | Actualizada ás 14:17
Os portavoces de BNG e PSdeG, Ana Pontón e José Ramón Gómez Besteiro, criticaron este domingo as emendas presentadas este fin de semana polo PPdeG á lei de acompañamento aos orzamentos da Xunta para 2025.
Así, en declaracións aos medios na concentración convocada por Queremos Galego, Pontón reprochou que o PP "se autoenmenda" e as medidas fiscais van todas "na mesma dirección": "Favorecer aos que teñen moitos pisos en propiedade, pero nin unha soa política para que as rendas medias e baixas que non teñan garantido o acceso a vivenda vexan como iso ten algunha solución".
Nesta liña, lamentou que "se segue favorecendo aos grandes rentistas" en lugar de "apoiar unha política fiscal que faga que se mobilice vivenda". Así mesmo, cuestionada sobre a emenda dos populares que introduce que se poderán 'retramitar' parques eólicos parados de forma máis simplificada, Pontón manifestou que o que fan é "tentar pasar por encima da xustiza".
Na mesma liña expresouse o secretario xeral dos socialistas galegos, José Ramón Gómez Besteiro, que manifestou que "é moi difícil seguirlle a pista ao PP". "Non sabemos cal é o Corgos verdadeiro, o que presenta os orzamentos ou o que presenta as propias emendas", censurou.
Sobre a emenda dos parques eólicos, Besteiro esgrimiu que "despois do parón do Plan eólico e das perdas en investimentos", esas modificacións serán "inútiles" se non se adaptan "á lexislación europea e á nova planificación".
