A última etapa da proba ciclista 'O Gran Camiño' dará comezo en Betanzos e finalizará en Santiago o 2 de marzo
O exciclista e organizador da competición, Ezequiel Mosquera, adianta que non será "nin contrarreloxo nin de montaña".
Por Europa Press / Redacción | A CORUÑA | 03/01/2025 | Actualizada ás 17:04
A quinta e última etapa da competición ciclista de referencia en Galicia 'O Gran Camiño' 2025 dará inicio en Betanzos e finalizará en Santiago de Compostela o vindeiro domingo 2 de marzo. Así se anunciou este venres en Betanzos durante a presentación da etapa, na que participou o presidente da Deputación da Coruña, Valentín González Formoso, tal e como informou a institución provincial nun comunicado. Durante a súa intervención, Formoso destacou o forte "vínculo" que mantén esta proba co Camiño de Santiago, que dota á competición dun "empaquetado histórico" e unha "dobre alma". Do mesmo xeito, recalcou o "apoio" incondicional da deputación ao deporte e cualificou a Betanzos como un municipio "moi vinculado" ao ciclismo.
No acto tamén estivo presente o exciclista e organizador da proba, Ezequiel Mosquera, que avanzou que esta última etapa non será contrarreloxo nin de montaña, pero que igualmente será "moi espectacular". Ademais, definiu 'O Gran Camiño' como unha posibilidade de "levar o deporte de primeiro nivel á porta das casas". Do mesmo xeito, participaron o deputado de deportes, Antonio Leira; e a alcaldesa de Betanzos, María Barral, que agradeceu á deputación a súa aposta por Betanzos para o desenvolvemento desta proba. Ademais, asistiron representantes do Clube Ciclista de Betanzos e o Clube Caimanes Betanzos.
De momento, ademais do referido a esta quinta etapa, o que se sabe é que a proba dará inicio en Portugal o 26 de febreiro, nun primeiro percorrido desde Maia ata Matoshinos, e que pasará polas catro provincias galegas. Esta edición constitúe o cuarto ano consecutivo que se celebrará esta competición, que nas edicións anteriores chegou a reunir a algunhas das principais figuras e equipos do ciclismo nacional e internacional, como o vixente campión, Jonas Vingegaard.
