A segunda etapa da proba ciclista O Gran Camiño unirá Marín e A Estrada o 27 de febreiro

A segunda etapa do Gran Camiño celebrarase o próximo 27 de febreiro cun percorrido entre os concellos de Marín e A Estrada, un tramo que foi presentado este martes e no que o presidente da Deputación de Pontevedra, Luís López, definiu ás Rías Baixas como a "provincia do deporte". Nun comunicado, a institución provincial puxo en valor que a cuarta edición desta carreira ciclista, unha referencia no calendario do ciclismo, volverá levar á provincia aos mellores ciclistas do mundo e dará a coñecer a riqueza natural e paisaxística do territorio e profundará na consolidación dun modelo turístico sustentable e desestacionalizado ligado ao deporte.

"Despedimos o ano 2024 anunciando un acontecemento de impacto mundial: o regreso do pelotón da Volta a España á nosa terra, cunha etapa entre Poio e Mos; e damos a benvida ao 2025, con outra noticia de gran relevancia: O Gran Camiño volverá traer á nosa provincia o ciclismo mundial. É dicir, no 2025, Pontevedra seguirá sendo a provincia do ciclismo, a provincia do deporte", afirmou o presidente no acto no que tamén participaron a deputada provincial e alcaldesa de Marín, María Ramallo; o alcalde da Estrada, Gonzalo Louzao; e o director da carreira, Ezequiel Mosquera.

Despois do espectáculo ofrecido o ano pasado coa celebración da etapa definitiva entre Ponteareas e o alto do Monte Aloia en Tui, o pelotón volve atravesar a provincia cunha etapa de media montaña con saída desde Marín e meta na Estrada, que pasará por municipios como Pontevedra, Barro, Caldas ou Cuntis; e que contará con ascenso a portos de segunda e terceira categoría que conforman unha etapa que evocará o espírito das clásicas. As novidades desta cuarta edición do Gran Camiño, que se celebrará entre o 26 de febreiro e o 2 de marzo, pasan pola incorporación dunha quinta etapa e cun orzamento de carreira novo no país veciño de Portugal cun percorrido entre Maia e Matosinhos.

Presentación da segunda etapa de O Gran Camiño, que unirá Marín e A Estrada o 27 de febreiro | Fonte: DEPUTACIÓN