Seis feridos en dous accidentes na provincia de Ourense
Tiveron lugar en Cenlle e no Pereiro de Aguiar.
Por Europa Press / Redacción | OURENSE | 07/01/2025 | Actualizada ás 21:21
O día remata con dous aparatosos accidentes en Ourense, que deixan seis feridos. O primeiro tivo lugar no Pereiro de Aguiar, tras un choque entre dous vehículos que se saldou con tres persoas feridas, das cales dúas tiveron que ser excarceradas.
O 112 deu aviso aos bombeiros de San Cibrao das Viñas e aos membros do GES de Pereiro de Aguiar, quen, unha vez finalizada a súa intervención, indicaron que foi necesario empregar material de excarceración para liberar ao condutor e ao copiloto dun dos vehículos implicados.
Por outra banda, unha saída de vía en Cenlle saldouse con tres persoas feridas. O accidente tivo lugar na A-52, entre os quilómetros 245 e 246, á altura da parroquia de Razamonde, segundo informou o 112 Galicia. Foron varios os particulares que contactaron co 112 Galicia sobre as 17.15 horas para informar dun coche envorcado con posibles persoas atrapadas no seu interior.
