O Parlamento galego pide a creación dun programa de transición a idade adulta dos pacientes psiquiátricos novos

O Parlamento galego instou á Xunta, a través dunha proposición non de lei do PPdeG na Comisión 5ª de Sanidade (con respaldo dos demais grupos, excepto o BNG) a crear un programa de transición á idade adulta para os pacientes psiquiátricos adolescentes. Tamén para aumentar a idade de atención da psiquiatría infanto-xuvenil aos 18 anos. A iniciativa foi presentada pola deputada popular María Encarnación Amigo quen, ante as intervencións desde as filas do BNG e o PSdeG sobre o feito de que se pedise neste punto un asunto xa anunciado pola Consellería de Sanidade, precisou que obedecía a que o texto se rexistrase antes na Cámara galega.

"Só lles importa a crítica constante", aseverou, mentres, á postura mantida pola parlamentaria do BNG Montserrat Prado quen cualificou a iniciativa de "botafumeiro". "Sería bo que algunha vez os anuncios se concretasen", aseverou ante unha situación que cualificou de "dramática" en alusión, entre outras cuestións, aos suicidios en mozos. Mentres, desde o PSdeG a súa deputada Elena Espinosa considerou "difícil" que aspectos expostos en canto a toma de decisións se poidan tomar "a nivel ambulatorio" a pesar de trasladar o seu apoio para dar "un voto de confianza". Con todo, denunciou as listas de espera en psiquiatría en áreas sanitarias como as de Lugo e Vigo. "O que se trae aquí é estético, hai que avanzar con recursos suficientes", insistiu en liña co BNG que aludiu á falta de psicólogos clínicos en Atención Primaria.

A OPOSICIÓN URXE PEDIATRAS

Por outra banda, o BNG reclamou á Xunta, na mesma Comisión, adoptar "medidas" ante a "dramática" situación en Atención Primaria pero, en particular, en pediatría pola falta, dixo, de profesionais e de substitución xeracional. "O 62 % dos concellos non teñen pediatras", asegurou a deputada do BNG, Montserrat Prado, ao cifrar en 194 os municipios nesta situación e "11.000 nenos e nenas sen pediatra asignado". Fíxoo na presentación dunha proposición non de lei que non saíu adiante (o PP rexeitouna) e na que se instaba a pedir un informe ao Goberno galego sobre o número de pediatras, centros de saúde que non o teñen e previsión de xubilacións. Tamén tomar medidas para garantir o número de prazas MIR nesta especialidade.

Ás súas críticas, sumouse a parlamentaria socialista Elena Espinosa quen argumentou que non é un problema "conxuntural" senón "estrutural". "A Xunta está a mirar para outro lado, non vale culpar ao Goberno", aseverou sobre o Executivo central e para incidir en que ao PPdeG fáltanlle "ganas políticas para solucionar o problema". Na súa intervención, a deputada popular María Dolores Hermelo asegurou que hai máis pediatras que na época do bipartito e reprochou a socialistas e nacionalistas ser entón "os reis de reagrupar pediatras".

Fachada principal do Pazo do Hórreo, sede do Parlamento de Galicia | Fonte: Parlamento de Galicia - Arquivo

"Non son quen de dar leccións, non hai nada na súa política que poida mellorar o que estamos a facer na Xunta", engadiu para citar, entre outras cuestións, a oferta da "totalidade" das prazas nesta materia e para delegar no Goberno central que haxa máis prazas MIR nesta especialidade. Tamén apuntou a un "compromiso" nos orzamentos autonómicos deste ano. "Hai máis pediatras con menos pacientes", indicou para admitir, non entanto, que hai centros de saúde sen estes profesionais ao denunciar desde o BNG tamén a "desigualdade brutal" entre os galegos e as galegas que poden "pagar unha consulta privada" ou non.

FONDOS PARA PROGRAMAS DE EMPRENDEMENTO

Por outra banda, o Parlamento galego tamén instou á Xunta a dirixirse ao Goberno central para reclamarlle "os fondos necesarios que permitan pór en marcha programas específicos en materia de emprendemento". Expúxoo o PPdeG nunha proposición non de lei e nunha das comisións celebradas este xoves tras recibir a comunidade autónoma o premio 'Galicia Rexión Emprendedora Europea'. Na iniciativa, presentada pola deputada popular Noelia López, reivindícanse as xestións da Xunta nesta materia e, en particular, para "o fomento das áreas rurais".

"Non manda fondos", dixo a parlamentaria en alusión ás demandas ao Goberno central e tamén ao anuncio deste dunha rede nacional de centros de emprendemento para a que, sostivo, non se achegaron contías no caso da comunidade autónoma galega. Desde as filas socialistas considerouse un "autobombo" a iniciativa. "O Goberno (central) impulsa a actividade das empresas cun Plan de Recuperación, pero a Xunta carece de axilidade para a repartición do diñeiro". Desde o BNG, denunciouse ausencia dunha política da Xunta de "maneira coordinada" para a repartición de diñeiro e que os datos "non acompañan ao premio", ao aludir a falta de transporte público ou de servizos sanitarios ou educativos necesarios no rural. "A Consellería do Medio Rural non ten un plan aínda que lle dean premios", argumentaron.