Máis de seis meses de cárcere por agresións racistas nun supermercado en Lugo
Os procesados recoñeceron os feitos e asumirán indemnizacións ás vítimas e sancións económicas
Por E.P. | SANTIAGO DE COMPOSTELA | 17/01/2025 | Actualizada ás 14:19
Cinco dos seis acusados de esnaquizar un supermercado en Lugo e agredir ao seu propietario e a un empregado con expresións racistas aceptaron este venres unha condena de menos dun ano de prisión. O sexto implicado non compareceu no xuízo ao atoparse fuxido.
Os acusados, tras recoñecer os feitos, foron condenados por un delito contra a dignidade das persoas. Tres deles cumpriran unha pena de sete meses de prisión, mentres que os outros dous recibiron unha condena de seis meses. Ademais, deberán pagar multas diarias de seis euros durante un período combinado de 17 meses polos delitos leves de lesións e danos. Como parte da sentenza, teñen prohibido achegarse ás vítimas durante tres anos.
O acordo, que evitou a celebración do xuízo tras unha negociación entre as partes, inclúe tamén unha indemnización económica polas lesións e os danos materiais e morais causados ao propietario, ao empregado e ao local. Un dos acusados, de nacionalidade venezolana, logrou evitar a súa expulsión de España e cumprirá a mesma pena que o resto.
FEITOS DO CASO
Os sucesos tiveron lugar en febreiro de 2021, nun supermercado da rúa Isidro Labrador en Lugo. O establecemento é propiedade dun home de nacionalidade marroquí, que contaba cun empregado de orixe palestina. Segundo o recoñecemento dos acusados, entraron no local e romperon escaparates, mobles e mercadoría empregando paus, patas de cabra e outros obxectos contundentes.
Durante a agresión, os acusados golpearon o propietario e o seu empregado mentres proferían berros racistas, con frases como: "mouros de merda", "marchádevos ao voso país" e "ímosche a queimar a tenda". A nai do propietario, que se encontraba no local, non sufriu lesións, pero os danos materiais ascenderon a 2.512 euros.
