Cachan a un home de 85 anos sen un brazo conducindo unha furgoneta non adaptada en Toén
A identificación foi posible grazas a varias chamadas á Garda Civil que alertaban da condución errática dun vehículo que circulaba polo medio da calzada e non sinalizaba as manobras.
Por Europa Press / Redacción | OURENSE | 28/01/2025 | Actualizada ás 15:20
Un condutor de 85 anos foi interceptado por axentes da Garda Civil de Tráfico cando circulaba polo municipio ourensán de Toén ao volante dunha furgoneta non adaptada ás súas condicións físicas, xa que o home carece de brazo dereito, co cal, soltaba o volante coa súa man esquerda para realizar o cambio de marcha. Diso informou este martes a Garda Civil de Ourense, que formulou unha denuncia por varias infraccións administrativas.
A identificación foi posible grazas a varias chamadas á Garda Civil que alertaban da condución errática dun vehículo que circulaba polo medio da calzada e non sinalizaba as manobras. Unha patrulla foi mobilizada ao municipio de Toén, onde localizou unha furgoneta que realizaba estas manobras, conducido por un home que carece do brazo dereito, polo que debía soltar o volante para cambiar de marcha coa man esquerda. O vehículo que manexaba non estaba adaptado ás súas condicións físicas, polo que os axentes formularon unha denuncia administrativa ante a Xefatura Provincial de Tráfico por condución anómala e por incumprir as restricións e limitacións que posúe.
