O Revenidas finalista en tres categorías dos premios Iberian Festival

O festival Revenidas de Vilaxoán presume de ser finalista en tres categorías dos prestixiosos premios Iberian Festival Awards 2025: Mellor Festival de Formato Medio, Mellor Fotografía de Festival e Mellor Cobertura de Vídeo.

Esta selección supón xa un recoñecemento previo que deixa en moi bo lugar o gran traballo da organización nestes anos e que reforza a ilusión por seguir adiante e buscar a mellora para as vindeiras edicións. O festival de Vilaxoán conságrase deste xeito entre os dez mellores festivais deste formato da península, xunto ao SonRías Baixas (Bueu), Noches del Botánico (Madrid), Festival Gigante (Guadalajara), Stone & Music Festival (Mérida) e outros cinco festivais de Portugal.

A gala de entrega de premios da oitava edición dos Iberian Festival Awards terá lugar en Almancil (Loulé), no Algarve, o 21 de marzo.

A edición de 2024 do festival Revenidas, celebrada do 12 ao 14 de setembro, congregou a 25.000 asistentes nun extraordinario ambiente e cunha reafirmada aposta pola música galega (Tanxugueiras, Fillas de Cassandra, The Rapants, Guadi Galego, Dakidarría, Rebeliom do Inframundo…) e grandes artistas do panorama internacional (Talco, Dubioza Kolektiv) e estatal (La Pegatina, Narco, El Kanka…).

FORTALEZAS DO FESTIVAL

A candidatura do Revenidas destacou o feito de que unha pequena poboación como é Vilaxoán, cun censo menor a 2.000 persoas, sexa quen de acoller un festival desta dimensión e con estas características. Tamén se subliña o gran impacto económico que o Revenidas xera: valorado pola USC en dous millóns de euros, con 150 postos de traballo directos, que se suman aos máis de 500 entre técnicos e artistas. Por último, tamén se ten en consideración a programación paralela, a maiores dos 40 concertos, coa sardiñada popular, a Gala de Circo Solidaria, os concertos a bordo ou o roteiro turístico pola vila.

MELLOR FOTO DE FESTIVAL

Christian Pérez, responsable da vertente fotográfica do Revenidas dende hai case unha década, volve a ser finalista na categoría de Mellor Fotografía de Festival. A imaxe candidata foi tomada durante o concerto de Tanxugueiras no momento no que o trío de pandereteiras cantou entre o público.