Foro Galego de Inmigración denuncian "racismo institucional" por remitir aos migrantes a webs "colpasadas"
Critican que non se poida acudir ás comisarías a resolver trámites que son derivados á web xeral de estranxiría que está "permanentemente colapsada".
Por Europa Press / Redacción | SANTIAGO DE COMPOSTELA | 03/02/2025 | Actualizada ás 21:18
O Foro Galego de Inmigración denunciou este luns que a Comisaría de Policía de Santiago remitiu unha comunicación a concellos, ONG, entidades sociais e outros colectivos anunciado que, a partir deste mes de febreiro, os solicitantes de asilo deberán dirixirse á web xeral de estranxeiría, do mesmo xeito que xa ocorre no resto da provincia da Coruña.
O Foro cualificou esta situación como "un novo exemplo de racismo institucional", xa que este sitio web está "sempre colapsado", e lamentou que se poña fin ao anterior sistema de cita telefónica implantado en febreiro de 2023. Segundo lembrou esta entidade, precisamente debido a esa situación de colapso, levaron a cabo unha serie de reunións con mandos policiais de Galicia en 2022, e estes mesmos mandos "recoñeceron o colapso permanente" da web, "atacada sistematicamente por 'bots' que conseguen centos de citas en pouco tempo en diferentes lugares do Estado". Isto tiña unhas consecuencias "aberrantes", xa que se establecían sistemas de venda de citas para persoas migrantes "desesperadas".
A partir desas reunións, acordáronse sistemas alternativos: cita presencial en Pontevedra, cita mediante correo electrónico na Coruña, e citas telefónicas en Santiago, Vigo, ou Ferrol. No caso de Santiago, o Foro explicou que o sistema funcionaba de forma aceptable e garantía a posibilidade de atender a unidades familiares completas (que non é posible na web). Por iso, alertaron de que "a imposición de volta ao sistema informático, sen explicación nin xustificación algunha", só pode obedecer "a un novo intento de desesperar á poboación migrante e impedir, na práctica, o seu acceso a un dereito humano fundamental".
Por iso, reclamaron que se manteña o actual sistema de citas, tanto en Santiago como no resto de Comisarías da provincia da Coruña, e esixiron un compromiso dos mandos policiais para convocar ás entidades sociais para acordar calquera tipo de cambio respecto diso, que sexa para "mellorar" o acceso a este dereito "e non para impedilo na práctica".
