Rueda contrario á postura de Mazón: "Coa condonación da débeda saíriamos perdendo moitísimo máis"

O presidente da Xunta, Alfonso Rueda, avisou ao seu homólogo da Comunidade Valenciana, Carlos Mazón, de que "acabaría perdendo moitísimo máis" do que gañaría coa condonación da débeda tal e como o expón o Goberno central. "Sinceramente, polo que falei con todos os meus compañeiros, incluídos os que presiden comunidades endebedadas, isto téñeno bastante claro", sinalou. En concreto, Rueda advertiu de que a condonación está a ser ofrecida como "reclamo" por parte do presidente do Executivo, Pedro Sánchez, e no marco do financiamento singular para Cataluña, polo que apostou por rexeitala. Así se pronunciou a preguntas do director de 'El Mundo' no foro que organiza este diario na capital galega.

Consciente de que a situación da débeda "non é igual en todas as comunidades autónomas", Rueda lanzou esa mensaxe ao seu homólogo valenciano, tamén do Partido Popular. "É máis fácil para min (polo nivel de débeda), pero todas sairiamos perdendo", asegurou. Así mesmo, avanzou que escoitará ao presidente de Cataluña, Salvador Illa, na súa próxima visita a Galicia para falar, precisamente, sobre financiamento. "Falar hai que falar sempre", afirmou. Pola súa banda, reivindicou a "vixencia" da denominada 'Declaración de Santiago' e espera que saia adiante a renovación da adhesión a este acordo promovida xunto co presidente de Aragón.

"PERIGO DE CONTAXIO"

Previamente, no seu discurso, Alfonso Rueda referiuse á "perigosa capacidade de contaxio" de posturas que identificou co independentismo e que tachou de "egoísmo". En calquera caso, valorou que hai unha "etapa felizmente superada" xa que, hoxe en día, "ningún presidente fala de romper España".

"DIVISIÓN NAS CCAA DO PP"

Máis adiante, no coloquio, o director de 'El Mundo' preguntou a Rueda pola condonación da débeda como "ferramenta que utiliza o Goberno para xerar división nas comunidades que goberna o PP". "Está seguro de que todos os seus compañeiros pensan o mesmo que vostede?", interrogoulle. "Eu son consciente de que a situación respecto da débeda non é igual en todas as comunidades autónomas. Eu teño compañeiros que herdaron comunidades absolutamente endebedadas", sinalou o titular da Xunta. Cuestionado sobre se se refería a Valencia, contestou: "En Valencia, por exemplo". Pola súa banda, resaltou que Galicia ten "uns intereses para o pago da débeda perfectamente asumibles" e por iso, ao seu xuízo, "é máis fácil" para el "que para outras comunidades dicir 'nisto non imos caer".

"Pero todas sairiamos perdendo. Se Valencia ou calquera comunidade autónoma, na miña opinión, pola urxencia de deixar de pagar uns intereses, acepta que xa non vai falar do financiamento, estaría a perder moitísimo máis, e eu sinceramente polo que falei con todos os meus compañeiros, incluídos os que presiden comunidades endebedadas, isto téñeno bastante claro", precisou. E, nesta liña, engadiu que ao "igual" está "clarísimo que isto é un reclamo do Goberno para ao final (...) pechar no Consello de Política Fiscal e Financeira un financiamento singular para Cataluña".

FEIJÓO, "O DE SEMPRE"

Noutro momento, Rueda foi preguntado polo líder do PP, Alberto Núñez Feijóo, ao que coñece desde hai "moitos anos" e no que segue vendo "ao de sempre", aínda que nunha contorna "diferente" e "moi difícil". "Convencido" de que terminará sendo presidente, ante as cuestións do director de 'El Mundo', recomendoulle "seguir así" e "non perder o rumbo". No tocante á "extrema dereita", o presidente galego subliñou que debe haber unhas "liñas vermellas" que o PP ten "claro", e apuntou que "se quere conformar maiorías" os acordos "son necesarios". Por último, e cuestionado en materia de vivenda, despois de admitir que este problema se debía "saber ver vir con máis antelación", indicou que "a ver se é verdade" e o Executivo central promóvea, á vez que remarcou que a sociedade creada pola Xunta xa o está facendo.