A Xunta de Galicia recibe máis de 1.300 solicitudes no primeiro día do bono Emancípate

A Xunta de Galicia rexistrou máis de 1.300 solicitudes no primeiro día do prazo para pedir o Bono Emancípache, unha axuda destinada a mozos de entre 18 e 35 anos para sufragar os primeiros gastos derivados da independencia, como a compra de mobiliario, electrodomésticos, artigos do fogar, transporte de mudanza ou xestións administrativas.

O orzamento total da convocatoria ascende a dous millóns de euros e complementa outras medidas postas en marcha pola administración autonómica para facilitar a emancipación, como as axudas á compra e alugueiro de vivenda.

AXUDA DE ATA 3.000 EUROS PARA ESTABLECER UN FOGAR

O Bono Emancípache ofrece unha axuda de 1.500 euros para quen opte por vivir de alugueiro e de 3.000 euros para quen adquira unha vivenda en propiedade. Para poder acceder a este incentivo, os solicitantes deben cumprir unha serie de requisitos, entre eles:

• Ter entre 18 e 35 anos.
• Dispoñer dunha fonte regular de ingresos.
• Estar empadroados na vivenda obxecto da axuda.
• Contar cun contrato de aluguer ou compravenda posterior a maio de 2024.
• Cumprir cos límites de renda establecidos na convocatoria.

A solicitude pode tramitarse a través da sede electrónica da Xunta ata o 30 de abril e as axudas concederanse por orde de chegada, ata esgotar o crédito dispoñible.

As persoas beneficiarias do Bono Emancípache recibirán a axuda a través dun cartón moedeiro virtual expedido ao seu nome. Esta tarxeta permitirá realizar compras en comercios especializados, grandes superficies, xestorías e notarías con establecemento físico en Galicia. Non será válida para compras en liña e a súa utilización estará limitada ata o 31 de decembro de 2025.

A Xunta destaca que esta medida busca facilitar a transición á vida independente da mocidade galega, reducindo a carga económica inicial que supón establecer un novo fogar.