O PSOE propón un sistema público de bicicletas eléctricas a préstamo en Pontevedra

O grupo municipal do Partido Socialista defenderá unha moción no pleno do Concello de Pontevedra do próximo luns 17 de febreiro na que pide a implantación dun servizo público de préstamo de bicicletas con pedaleo asistido. O portavoz municipal do PSOE, Iván Pontes, explicou este mércores que na súa proposta instan o goberno local a acollerse ás axudas do Ministerio de Transportes e Mobilidade Sustentable para pór en marcha este servizo e integralo no sistema de billete único do transporte metropolitano.

Iván Pontes sostén que deste xeito o aluguer sería compatible co billete de tren e autobús. A proposta tamén lle solicita ao concello a realización dunha campaña de información pública que permita á cidadanía coñecer e acollerse ás axudas para a adquisición de ciclos de pedaleo asistido.

Ademais demandan o "desenvolvemento progresivo" da infraestrutura necesaria para promover a mobilidade ciclista. Isto significaría a dotación de estacións de mantemento e lavado, aparcabicis "seguros" e carrís bici "alí onde sexa preciso".

Segundo lembrou o concelleiro do PSOE pontevedrés, o Consello de Ministros deu luz verde o pasado 28 de xaneiro ao Real Decreto-Lei 1/2025, que no Capítulo V (art. 29-33) establece unha liña de axudas a persoas físicas e xurídicas para a adquisición de ciclos de pedaleo asistido e no Capítulo V, sección 2ª (art. 47 a 54) aproba outras subvencións destinadas a que os concellos implanten e amplíen os servizos públicos de préstamo de bicicletas, cubrindo como mínimo o 40% do custo do mesmo. "Estamos no momento idóneo para darlle un impulso definitivo ao uso da bicicleta en Pontevedra", manifestou Iván Pontes.

Servizo de aluguer de bicis eléctricas en Vigo, dispoñibles en sete parking da cidade.. CONCELLO DE VIGO