A Deputación de Lugo di que a delegada da Xunta desfrutou de viaxes gratis na época de Cacharro
Detaca que a suposta “contabilidade irregular” que investiga de Lara tivo lugar con gobernos do Partido Popular e di que moitos dos traballadores do organismo provincial que figuran na suposta “lista negra” mantiveron ou melloraron a súa situación laboral.
Por Galicia Confidencial | Lugo | 29/03/2016 | Actualizada ás 20:54
O goberno da Deputación de Lugo acusou este martes á delegada da Xunta nesta provincia, Raquel Arias, de ser unha das beneficiadas das viaxes que o organismo provincial pagou durante a época de Cacharro Pardo e que investiga a xuíza Pilar de Lara no marco da Operación Pulpo.
“E máis explicacións deberían dar vostedes, pois coñecemos que membros do Partido Popular, como a señora Raquel Arias, entre outros moitos, disfrutaban das viaxes que o Goberno do PP na Deputación subvencionou ata 2006 a funcionarios e fillos de funcionarios. ¿Con que fondos se pagaban as viaxes aos Deputados do PP señora Candia?”, preguntouse o equipo de goberno provincial nun comunicado.
De feito, foi máis alá e suliñou que deben ser os "membros do Partido Popular" os que "teñen que dar explicacións á cidadanía", porque a suposta "contabilidade irregular" que apareceu nun dos computadores intervidos nesta operación "son gastos dos anos 2003, 2004, 2005 e 2006", cando gobernaba Francisco Cacharro Pardo. Por iso, pídelle á líder do PP de Lugo, Elena Candia, que explique por que membros do seu partido, entre eles, Raquel Arias, fixeron viaxes subvencionados pola Deputación até 2006.
Sobre a suposta "lista negra" que figura na causa --unha relación de funcionarios da institución cunha presunta afinidade co Partido Popular na que mesmo aparecen datos dos seus familiares--, a Deputación de Lugo destaca que esa lista "comprende nomes de traballadores" que iniciaron "o seu contrato laboral coa Deputación" tanto "na época do PP" como na "etapa de goberno progresista".
“Todas as persoas que figuran na mesma melloraron ou mantiveron as súas condicións laborais durante o últimos oito anos, como mostra irrefutable de que a lista que apareceu nun dos computadores intervidos no departamento de comunicación non tiña realmente a finalidade de sinalar aos funcionarios que aparecían nela”, indica.
Sobre esta cuestión tamén di que, como en todas as administracións, o departamento de prensa “garda informacións da institución, ben sexan notas ou comunicacións oficiais, así como calquera tipo de información que afecta á imaxe da Deputación”, aínda que a súa autoría non corresponda ao departamento de prensa. “Por este motivo, igualmente garda panfletos que atacan directamente ao propio persoal deste departamento, así como a Deputados. Polo tanto, informacións anónimas, das que foron vítimas”, engade.
