A Ría da Estrela presenta o catálogo de peregrinacións marítimas pola ría de Muros e Noia na ITB de Berlín

A Ría da Estrela e a Asociación de Municipios do Camiño da Ría Muros presentan o primeiro catálogo de peregrinacións marítimas a través da Ría de Muros e Noia no marco da feira ITB de Berlín 2025

Integrantes da naviera Sailway, que representan ao Camiño da Ría de Muros e Noia nesta edición da ITB Berlín, presentan o catálogo de peregrinacións marítimas para o ano 2025 con propostas da propia Sailway, da Asociación de Náuticos de Galicia (ASNAUGA) e do Monte Real Club de Iates de Baiona.

"Estamos a presentar unha maneira diferente de facer o Camiño de Santiago hoxe en día, pero que foi hai séculos a principal e a utilizada precisamente polos peregrinos de Alemaña e do norte de Europa: navegando", explicou José Antonio Marcote, responsable de comunicación da Ría dá Estrela. "Trátase dun novo produto turístico que desborda o ámbito da nosa ría, o Camiño Marítimo a través da Ría de Muros Noia, onde o turista ou peregrino pode reservar barcos ou camarotes para gozar dunha experiencia absolutamente única nunha das zonas turísticas máis espectaculares a nivel mundial", engadiu.

O Catálogo de peregrinacións marítimas a través da Ría de Muros e Noia ofrece peregrinar a Santiago a través dunha ría e uns portos cunha longa tradición xacobea, especialmente o de Noia, que no seu momento foi o Portus Apostoli de Compostela. Unha travesía que rememora a travesía que seguiron miles de peregrinos desde os tempos da Segunda Cruzada e que está amparada pola Oficina do Peregrino. De feito, basta con completar 90 millas náuticas en veleiro, selar a credencial do peregrino nos portos que marque a ruta e realizar a pé polo menos os 12 últimos quilómetros entre Bertamiráns e Santiago para obter a Compostela.

Ponte sobre a Chanca na praia de Esteiro, en Muros | Fonte: masmar.es