Deteñen en Ferrol a un home tras ferir a dous mozos cunha botella

A Policía Local de Ferrol detivo na madrugada deste sábado a un home acusado de causar feridas a dous mozos tras lanzar unha botella de vidro ao chan, cuxos cristais impactaron nos rostros das vítimas. Os feitos ocorreron arredor das 00:50 horas na rúa Pardo Baixo, segundo confirmaron fontes municipais.

Tras o suceso, o home fuxiu da zona, mais foi localizado e detido polos axentes locais nas inmediacións da rotonda de González Chairos. Ao lugar tamén se desprazou unha patrulla da Policía Nacional, que asumiu a investigación do caso.

As dúas persoas feridas foron atendidas por Urxencias Sanitarias de Galicia-061 e trasladadas en ambulancia ao Complexo Hospitalario Universitario de Ferrol (CHUF), onde recibiron atención polos cortes provocados polos fragmentos de vidro.

A Policía investiga agora as circunstancias exactas do incidente, mentres o detido permanece a disposición xudicial. Polo momento non transcenderon máis detalles sobre a identidade das persoas implicadas nin sobre a gravidade das feridas.