Traballadores da residencia pública de maiores de Caranza, en Ferrol, acusan á dirección de "malos tratos"
Esixen á Consellería de Política Social que cese á súa directora.
Por Europa Press / Redacción | FERROL | 18/03/2025 | Actualizada ás 18:35
Os traballadores da residencia pública de maiores situada no barrio ferrolán de Caranza, cuxa xestión é competencia da Consellería de Política Social, acusaron á dirección de "malos tratos" cara aos traballadores e reclamaron cunha concentración o cesamento da actual directora. A protesta foi convocada polo comité de empresa, do que forman parte cinco organizacións sindicais, e cuxa presidenta, Mar Peteira, sostivo que, desde que está a nova dirección, o persoal deste centro "se sente maltratado".
A presidenta do Comité explicou que os traballadores pediron unha reunión coa dirección pero que foi "imposible chegar a ningún acordo" porque "a táctica desta dirección é culpar de todo aos demais". Así, a representante da CIG explicou que a directora asegura que "non é responsable de nada" e que "todo é responsabilidade dos cargos intermedios ou dos propios traballadores". Ademais, censurou que "se empezou con faltas de respecto ao persoal, menosprezando, gritando ou chamando a atención ante o resto de traballadores e usuarios".
CONDICIÓNS LABORAIS
Entre as reclamacións, ademais, explicou que está o feito de que hai persoas que, pola súa elevada idade, reclaman un posto de traballo adaptado ao non ser "quen de facer o seu traballo". Ante iso, explica que a mutua adapta o traballo pero que a Xunta non contrata a ninguén de apoio, co que se "sobrecarga de traballo ao resto de compañeiros". A iso, segundo indicou, sumar que "hai en moitas categorías nas que xa non hai lista de contratación, porque a xente non quere ir traballar" e que mesmo, "habendo lista, hai xente que renuncia a ir traballar a este centro, porque as condicións non son as óptimas, porque pola contra si viría".
Neste contexto, explica que "non se poden dar os días, non se poden dar as vacacións" ou chaman aos traballadores cando "están a librar para que vaian cubrir as ausencias", o que leva a que "a xente cada vez estea máis esgotada, por traballar en condicións penosas". En canto ás instalacións, Mar Peteira detallou que este edificio foi obxecto "fai moi pouco tempo dunha remodelación" polo que non entenden por que "hai continuamente filtración de auga", o que motiva "ter que andar con caldeiros polo edificio para recoller a auga que cae, rompen as tubaxes", xa que ao seu entender "as condicións non son boas", logo de "gastar unha chea de diñeiro".
Segundo a representante do comité de empresa desta residencia de maiores a situación actual tamén afecta aos usuarios ao asegurar que hai xente que está na casa "porque xa non é quen de ir traballar", algo que, ao seu entender, "aos usuarios, naturalmente, repercútelles". A día de hoxe nesta residencia situada en Ferrol hai ao redor de 100 traballadores, ofrecendo unhas 140 prazas.
