A primavera arrinca este xoves ás dez da mañá e haberá unha eclipse parcial de sol o sábado 29 de marzo

A primavera arrincará este xoves, 20 de marzo, ás 10.00 horas da mañá, e prolongarase durante case 93 días, ata as 22.42 horas do 21 de xuño. Ademais, o sábado da próxima semana, 29 de marzo, haberá unha eclipse parcial de sol, que será o primeiro dun refacho que continuará en 2026 cun total que terá lugar o 12 de agosto. Segundo traslada José Ángel Docobo, coordinador científico do Observatorio Astronómico Ramón María Aller da Universidade de Santiago de Compostela (USC), durante o inicio da nova estación as duracións do día e a noite son "teoricamente iguais".

"O sol sae exactamente polo leste e o solpor prodúcese exactamente ao oeste", detalla Docobo. Con todo, debido á luz crepuscular, antes da saída do sol e tras a súa posta, a claridade supera á escuridade. Así mesmo, o profesor do Observatorio Ramón María Aller explica que a lúa está relacionada coa época na que cadra a Semana Santa: "O Domingo de Pascua (20 de abril) é o domingo seguinte á primeira lúa chea da primavera (13 de abril)".

ECLIPSE PARCIAL ANTES DUN TOTAL EN 2026

En canto á eclipse do 29 de marzo, será parcial pero dará inicio a unha serie que continuará na tarde do 12 de agosto de 2026. Será total no norte e leste de Galicia, incluíndo as cidades da Coruña, Ferrol e Lugo, pero en lugares como Santiago, Pontevedra, Vigo e Ourense será parcial aínda que "cunha moi alta magnitude". Esta eclipse será o primeiro total de sol na Península Ibérica tras o que houbo o 17 de abril de 1912. Naquel momento, a liña de totalidade entrara polo Porto, pasando por Verín e O Barco de Valdeorras para saír ao Cantábrico tras atravesar O Bierzo e Asturias. O próximo ano, despois de 114, a fase total da eclipse volverá pasar, casualmente, pola comarca ourensá de Valdeorras, tal e como avanza Docobo. Tras este, en 2027 e 2028 haberá outras eclipses parciais de sol en Galicia.

Unha moza camiña fronte a un campo cheo de margaridas o día que comeza a primavera, no Campus da USC, a 20 de marzo de 2023, en Lugo | Fonte: Carlos Castro - Arquivo