Rueda chama "ao gran capital" a investir e apostar en innovación
Estarán centradas en áreas prioritarias: biotecnoloxía, fomento da IA e a cuántica, e apoio a proxectos de desenvolvemento empresarial
Por Europa Press / Redacción | SANTIAGO DE COMPOSTELA | 02/04/2025 | Actualizada ás 16:48
O presidente da Xunta, Alfonso Rueda, lanzou este mércores unha chamada "ao gran capital entendido como todo o que queira achegar" desde o ámbito empresarial para apostar pola investigación, a innovación e pola atracción de talento a Galicia. Unha comunidade que, incidiu, aspira a acuñar "o concepto I+G+i".
Non en balde, á vez que anunciou tres novas convocatorias por máis de 10 millóns de euros para proxectos de I+D+i e tecnoloxía de alto impacto, o mandatario galego ligou este novo concepto coa necesidade de "alimentar Galicia Calidade" nun escenario no que a innovación ten un papel crave. "Queremos que Galicia sexa referente, que a nosa marca propia ocupe o lugar que se merece", proclamou, antes de reivindicar que hai capacidade e talento e de agradecer a colaboración do tecido das universidades e dos centros de investigación.
Rueda lanzou esta mensaxe na clausura do acto de presentación ante o sector do 'Plan galego de investigación e innovación 2025-2027', no que tamén interveu o conselleiro de Educación, Ciencia, Universidades e FP, Román Rodríguez. Así mesmo, contou cunha mesa redonda de debate previo no que participaron o CEO e fundador de Mestrelab, Santiago Domínguez; o director do centro tecnolóxico Cetim, Antoni Pons; a catedrática de Inmunología da Universidade de Vigo África González; e Carmen Cotelo, directora da Axencia Galega de Innovación (Gain).
Unha mesa na que, entre outras cuestións, tamén se incidiu na importancia da implicación do capital galego, que, posteriormente, retomou e fixo seu o propio presidente.
"CONSOLIDAR GALICIA COMO REFERENTE INNOVADOR"
Ademais, no transcurso da súa intervención, Rueda anunciou o lanzamento de tres novas convocatorias de axudas destinada a impulsar a investigación, a innovación e o desenvolvemento tecnolóxico en Galicia. Estas iniciativas, dotadas con máis de 10 millóns de euros, teñen como obxectivo "consolidar Galicia como un referente innovador e no I+D+i".
As novas axudas centraranse en tres ámbitos que a Xunta ve prioritarios, empezando por proxectos colaborativos no sector da biotecnoloxía, co obxectivo de reforzar as capacidades do mesmo.
As outras dúas convocatorias irán ligadas a proxectos colaborativos das chamadas 'tecnoloxías profundas', dirixidas ao fomento da intelixencia artificial (IA) e a cuántica no ecosistema galego de I+D+i; e apoio a proxectos de investigación e desenvolvemento empresarial, que brinda apoio ás empresas para xerar solucións tecnolóxicas de alto impacto e o fomento do emprego altamente cualificado.
