Méndez Romeu deixa a política
De xeito inesperado e collendo por sorpresa para os seus propios compañeiros na bancada do PSdeG. Así acaba de anunciar no Parlamento José Luíz Méndez Romeu a fin da súa dilatada carreira pública.
Por M.V. | Santiago de Compostela | 15/07/2016 | Actualizada ás 13:40
Quen fora voceiro parlamentar do PSdeG na maior parte da lexislatura, aproveitou a súa intervención no último pleno da lexislatura para realizar o anuncio. O xesto -persoal e non pactado coa cúpula socialista- mostra as feridas abertas no grupo socialista.
Crítico coas mareas
O político coruñés competiu e perdeu nas primarias ante Xaquín Fernández Leiceaga. A competición xirou en boa medida sobre a relación coas mareas. Romeu, coruñés discípulo político de Paco Vázquez, apostaba por cuestionar os pactos para defender a primacia do PSOE na esquerda. Leiceaga á máis proclive ao entendemento coas confluencia e os resultados do 26X reforzárono, ao no producirse o sorpasso.
Trala axustada derrota nas primarias, os seus apoios na estrutura do PSdeG tentaron compensalo co cargo de senador por designación autonómica. A xestora de Pilar Cancela e os partidarios de Leiceaga mantivéronse firmes e, malia o intercambio de golpes dialécticos, ao final ninguén votou en contra da designación do candidato dos vencedores, Modesto Pose. Desencantado, Méndez Romeu tirou hoxe a toalla diante daqueles que lle non conferiron a súa confianza.
Biografía política
Nado na Coruña o 24 de xullo de 1951, estudou pedagoxía. Foi concelleiro de Educación e Cultura do Concello da Coruña desde 1987 ata 2003 a sombra do polémico Paco Vázquez e presidente da Orquestra Sinfónica de Galicia (1994-2004). Tenente de alcalde e Concelleiro de Urbanismo (2003-2004). Foi tamén responsábel de educación do grupo socialista no Parlamento de Galicia mentres foi deputado (1994-2004).
Entre 2004 e 2005 foi secretario de estado de Cooperación Territorial no goberno español. Exerceu o cargo de Conselleiro de Presidencia, Administración Públicas e Xustiza da Xunta de Galicia dende o 2 de agosto de 2005 ata 2009. Na lexislatura que remata este mes, foi voceiro do PSdeG-PSOE no Parlamento Galego até que se presentou as primarias.
