A Radio Galega estará na Feira de Artesanía da Pontenova

O evento é xa un referente nestas datas na provincia de Lugo recibindo cada ano moita máis xente que o anterior. A variedade e calidade dos expositores e a ponte de principios de decembro axudan á súa consolidación.

O interese polas feiras de artesanía e antigüidades vai a máis en Galicia feito que contribúe a que na Pontenova se dean cita moitos curiosos pero tamén cada vez máis comerciantes cualificados e profesionais do sector.

Nesta X Feira de Artesanía e Antigüidades, congréganse 30 anticuarios nacionais e internacionais e a 30 artesáns chegados de diferentes puntos de España. 

A oferta é moi completa e variada contando incluso cos seguintes obradoiros en vivo:

Tear, Cecilia Carballo Castrillón

Escultura en madeira, José Mª García Bouza

Forxa e obradoiro de navallas, José Mª Rodil Arruñada

Encaixe de bolillos e puntura en tea, Aurora Rodil López

Labores en tea e ganchillo, Michelle Pío Dasilva

Torno, Jesús Igresias Pereira

Cestería en vimbio, Luisa Martínez Vázquez

Este ano a Radio Galega estará presente o xoves 8 de 16.00 a 19.00 h. emitindo en directo dende a Casa da Cultura o programa “A Tarde”. Polo programa pasarán as autoridades e organizadores, artesáns, anticuarios e outros convidados. Entre os asistentes sortearase un Centro de Pranchado valorado en case 300 €.

Así, pois, dende 8 ao 11 de decembro o Concello da Pontenova acolle, na Praza dos Fornos da vila, unha interesante feira que recupera e pon en valor  os oficios tradicionais. A entrada é de balde e a hostalería do lugar ofrece un “Menú especial da Feira”.