A solución de Rueda ante o non de fondos do Goberno central a Altri
O presidente da Xunta acusou ao Goberno a discriminar a Galicia na repartición dos fondos europeos e de endurecer na Comunidade galega "a vara de medir ambiental" a proxectos como o de Altri.
Por Europa Press / Redacción | SANTIAGO DE COMPOSTELA | 23/04/2025 | Actualizada ás 11:11
O presidente da Xunta, Alfonso Rueda, acusou ao Goberno a discriminar a Galicia na repartición dos fondos europeos e de endurecer na Comunidade galega "a vara de medir ambiental" a proxectos como o de Altri. "Financiamento sen ningunha esixencia ambiental --noutras rexións--, todas as esixencias ambientais para Galicia", sostivo o presidente galego, que considerou que "non pode ser" que se os proxectos en Galicia cumpren as "durísimas condicións" se lles negue "todo" a pesar de "contar con declaracións de impacto ambiental aprobadas".
"Esíxesenos o que non se esixiu en proxectos que non as tiñan nin empezadas", censurou o titular do Executivo autonómico, que asegurou que Galicia non pode tolerar "discriminacións nin exclusións" baseadas "en escusas indefendibles". "Non podemos admitir discriminacións con fondos europeos e, por iso, avanzo que imos reclamar ao Goberno que destine, de forma directa, eses miles de millóns que están sen gastar e que acabarán perdéndose", dixo para incidir en que á Comunidade galega correspóndelle o 6 % dos máis de 18.000 millóns de euros e reclamar a súa xestión para poder "crear riqueza".
Todo iso nun discurso no que deu o "parabén" ao BNG e ao PSdeG por "demostrar ser eficaces" para "que non veña diñeiro a Galicia". Neste sentido, censurou que a oposición en Galicia "se opoña a todo" e considerou que o alcume de "os do non a todo" --que atribuíu ao BNG-- "empece a estar un pouco disputado polo PSOE". "Isto non é crítica, é crónica", afirmou.
PONTÓN PIDE QUE SE DIGA "CON TOTAL CLARIDADE" QUE NON SE VAI FINANCIAR
Pola súa banda, a portavoz nacional do BNG, Ana Pontón, insistiu en que o proxecto que a multinacional lusa Altri quere instalar no municipio lucense de Palas de Rei "non pode recibir" axudas públicas" e pediu ao PP e ao Goberno central que digan "con total claridade" que non vai financialo. A preguntas dos medios tras a intervención de Alfonso Rueda no Debate sobre o Estado da Autonomía despois de coñecerse que Altri quedaría fóra das axudas ao PERTE de descarbonización, Pontón lembrou que o BNG leva "moito tempo dicindo" que unha empresa que "quere contaminar o corazón" do rural galego "non podía recibir baixo ningún concepto axudas públicas para contaminar Galicia".
Con todo, lembrou que esta é "só unha parte das axudas", polo que volveu a insistir en que Altri "non pode recibir nin un só euro para contaminar" Galicia. "O que debería facer o PP e o Goberno central é dicir con total claridade que non se vai a financiar ese proxecto", reiterou antes de volver propor que eses 250 millóns que pide a multinacional se invistan "para recuperar o río Ulla, sanear a ría de Arousa e apoiar o tecido produtivo".
