Condena histórica para os directivos de Novacaixagalicia, que entran en prisión
Entre eles está Fernández Gayoso. É a primeira vez que a Audiencia Nacional ordena cárcere a exbanqueros condenados pola xestión das caixas
Por Galicia Confidencial | Madrid | 16/01/2017 | Actualizada ás 19:59
Sentencia histórica para a banca española. A Audiencia Nacional ordenou o ingreso en prisión para catro directivos de Novacaixagalicia (NCG) e un asesor xurídico que foron condenados en 2015 a dous anos de cárcere polo cobro de indemnizacións millonarias que se concederon a si mesmos antes de abandonar a entidade e que alcanzaron os 22 millóns de euros.
Os condenados son José Luís Pego Alonso, Gregorio Gorriarán Laza e Óscar Rodríguez Estrada --que prepararon as prexubilacións millonarias ante a previsión de que a entidade ía prescindir dos seus servizos de forma inminente--, Julio Fernández Gayoso (expresidente de Caixanova) e o asesor xurídico Ricardo Pradas Montilla, que ingresaron na tarde deste luns no cárcere.
A Sección Terceira da Sala do Penal denegou a suspensión da condena (confirmada polo Tribunal Supremo o pasado mes de setembro) e valorou a gravidade dos feitos. Trátase da primeira ocasión na que se ordena prisión para banqueiros condenados pola xestión das caixas de aforro.
Os exdirectivos, que favoreceron dietas presuntamente irregulares para 19 membros da entidade por valor de entre 9.000 e 308.700 euros, evitaron entrar no cárcere ao ser a súa pena de 24 meses e non ter antecedentes penais. Con todo a sala tivo en conta ademais que estes non devolveron o diñeiro que se fixou en sentenza e que teñen aínda causas pendentes coa xustiza.
Os contratos de alta dirección modificáronse en 2010 nun momento en que se reclamou 1.162 millóns de euros ao Fondo de Reestruturación Ordenada Bancaria (FROB) para superar a situación de inviabilidade das dúas caixas que ían fusionarse (Caixanova e Caixa Galicia).
PENAS EXIGUAS
A Sala do Penal corrixiu a súa sentenza o pasado mes de outubro e impuxo a dous dos exdirectivos condenados José Luís Pego e Gregorio Gorriarán a que indemnizasen con 10,4 millóns de euros á sucesora da entidade, modificando as cantidades fixadas en concepto de responsabilidade civil nunha primeira sentenza que foi anulada polo Tribunal Supremo.
O alto tribunal ordenou recalcular a responsabilidade civil pero confirmou a prisión para o cinco directivos. O Supremo considerou esas penas "exiguas" pero recoñeceu que non podía incrementalas porque ningunha parte cuestionounas á alza.
A Sala do Penal do Supremo estableceu que os condenados fixeron súas as cantidades millonarias "a través dun mecanismo que vai moito máis alá da adopción de actos erróneos no exercicio das súas facultades de administración"; é dicir, que executaron "inequívocos actos apropiatorios con fins de lucro persoal".
