Nueva Pescanova e DIA apostan pola diferenciación para crecer

Nueva Pescanova e DIA apostan pola diferenciación de marca e de produto para atraer ao cliente nun mercado que concentra cada vez máis competidores, tanto nacionais como internacionais.

Así o explicaron os conselleiros delegados de Nueva Pescanova, Ignacio González, e o da cadea de supermercados DIA, Ricardo Currás, que interviñeron este xoves no XXI Encontro de Alimentación e Bebidas, celebrado na escola de negocios Iese.

No caso de DIA, Currás destacou a proximidade da súa rede de establecementos, e a política de prezos: "Facemos todo o posible para ser os máis baratos do mercado".

Sobre a súa expansión, destacou que o grupo é forte en España, Portugal, Arxentina e Brasil, "aínda que quedan moitos territorios por conquistar".

Pola súa banda, González dixo que hai que "converter á compañía nunha que pesque o que vende", no seu caso, pescada e lagostino, pero presentados de forma innovadora.

Actualmente, o 85% das vendas de Nueva Pescanova concéntrase en cinco países: España, Portugal, Italia, Francia e Estados Unidos.

O XXI Encontro de Alimentación e Bebidas celebrado na escola de negocios Iese foi clausurado polo director xeral da Industria Alimentaria do Ministerio de Agricultura, Fernando Burgaz.

Burgaz destacou que a agroaalimentación é o segundo sector económico de España, tras o turismo, cun valor de 100.000 millóns de euros, así como unha balanza comercial positiva.