O Consello das Mareas activa a consulta sobre Paula Quinteiro que os críticos cren fóra "dos estatutos"

O Consello das Mareas, órgano de dirección do partido instrumental, activou o proceso para a convocatoria dunha consulta ás bases non vinculante sobre a continuidade de Paula Quinteiro. Así, a consulta podería celebrarse nun prazo de "dúas a tres semanas", segundo informaron Gonzalo Rodríguez e Victoria Esteban ao termo da reunión do Consello, que aprobou por 17 votos a favor a 3 en contra o inicio do procedemento para a convocatoria da consulta. Antes, unha comisión designada este sábado realizará un expediente informativo que será remitido á propia Quinteiro e aos inscritos de En Marea.

O sector crítico de En Marea, que se opón a dimisión da parlamentaria, censurou a decisión do Consello ao considerar que a consulta non conta con "garantías" dentro dos regulamentos internos do partido instrumental. Con todo, a Comisión de Garantías de En Marea emitiu esta semana un informe no que avala a consulta sobre este caso, aínda que matiza que o veredicto das bases non sería vinculante e que a decisión de dimitir corresponde unicamente á propia deputada.

Deste xeito, o resultado da pregunta ás bases será unha "opinión política" sobre a continuidade ou non de Quinteiro como representante de En Marea na Cámara galega. O regulamento do partido instrumental estipula que a revogación do cargo dun representante público debe facerse por outra vía que, polo momento, non contempla a dirección política. "Non consideramos ese escenario. Iso é só especulativo", indicou Gonzalo Rodríguez cuestionado sobre a posibilidade de iniciar un procedemento de revogación.

A dirección de En Marea considera que os inscritos conforman a "orixe da lexitimidade" tanto dos órganos políticos como do Grupo Parlamentario, polo que, no caso de que exista unha "diverxencia" entre ambos, son as bases quen teñen a capacidade para "resolvela". E é que este é o escenario que, desde que saíron á luz os feitos nos que se viu envolta Quinteiro, se produce no seo de En Marea, xa que os órganos políticos, Consello e coordinadora, piden a súa renuncia mentres a maioría do Grupo Parlamentario apoia a súa continuidade.

O Consello das Mareas celebrado en Santiago este sábado contou coa participación do portavoz orgánico e parlamentario do partido instrumental, Luís Villares; e con tres representantes do chamado 'sector crítico', enfrontado á dirección de En Marea despois das eleccións internas de comezos do ano 2017.

CONSULTA ÁS BASES

Así as cousas, o Consello das Mareas deste sábado aprobou a designación dun grupo de persoas que elaborarán un expediente informativo que será trasladado aos inscritos antes da votación e no que se recollerá tamén a exposición dos feitos e explicacións da propia deputada.

No caso de que Quinteiro presente a súa renuncia antes da realización da consulta, esta "paralizaríase", segundo explicou Gonzalo Rodríguez, que defendeu a validez desta convocatoria aténdose á interpretación dos estatutos nos que figura que poderánse levar a cabo consultas ás bases sobre asuntos de "especial relevancia política".

Esta interpretación foi avalada pola Comisión de Garantías que, con todo, lembrou que as bases non poderían emitir unha opinión "vinculante" e que a dimisión "é un acto voluntario que é exclusivo da persona electa que renuncia voluntariamente ao seu cargo".

CRÍTICOS

O sector crítico discrepa da interpretación dos estatutos por parte da dirección, como expuxo en declaracións aos medios á saída da reunión Gladys Afonso. Así, apuntou que a consulta "non cumpre coas garantías" que establecen "o regulamento e estatutos" de En Marea porque neles figura que poderán realizarse consultas "sempre que teñan motivos políticos, sociais e económicos".

Deste xeito, os críticos opinan que o caso de Quinteiro non entra dentro destes parámetros e que a intención da coordinadora (que equivale á executiva dun partido clásico) é disfrazar de consulta ás bases o que, aos seus ollos, é un proceso de revogación de cargo que debería realizarse por outras vías.

"Non estamos de acordo e non imos participar, porque tampouco respecta as garantías procesuais e de autodefensa da compañeira (Quinteiro)", remarcou Gladys Afonso, que fixo un chamamento a "recuperar os acordos fundacionais" aprobados na asemblea de Vigo e a "traballar" para dar voz "aos problemas da xente".

Cuestionado sobre a interpretación do regulamento por parte dos críticos, o portavoz da coordinadora, Gonzalo Rodríguez, incidiu en que o caso de Quinteiro é de "especial relevancia política" porque compromete "os obxectivos" marcados por En Marea na súa proposta política, que pasa por "ser absolutamente estritos" coa súa "esixencia ética".

Segundo Rodríguez, que non cre que a xestión do caso de Quinteiro estea a danar a imaxe do espazo político, o precepto de "esixencia ética" debe ser cumprido polos representantes de En Marea estean "no goberno ou na oposición" porque "a partir diso" poderán "cambiar as cousas e esixir aos demais".