O concello de Viana do Bolo repartirá bandeiras galegas para pendurar dos balcóns o día 25 de xullo
Dende o concello sinalan que hai que "dar un paso adiante como pobo" e facelo sumando as diferenzas porque existen "diferentes visións do País".
Por Galicia Confidencial | Santiago de Compostela | 23/07/2018 | Actualizada ás 14:35
Saber da nosa historia e ter orgullo de país."Orgullosos do pasado, dos recursos patrimoniais, mateirais e inmateriais, etnográficos, ambientais, culturais...", afirma o alcalde do concello de Viana do Bolo. Ao que engade que, o orgullo e as ganas, tamén o sinten para acometer o futuro: " debemos ter tamén confianza e ambición para a Nosa Terra". Por iso, o concello de Viana do Bolo agasallará con bandeiras galegas para perdurar nas fiestras, nos balcóns e así celebrar o Día da Patria. Estas bandeiras poderán recollerse este luns 23 e o martes 24, de 10:00 a 14:00 nas oficinas municipais.
Así, o alcalde asegurou que "Galiza precisa dar un paso adiante como pobo para deixar atrás as dependencias e as subordinacións que nos negan o futuro. Galiza precisa dese orgullo debémosllo a todas as mulleres e a todos os homes da estirpe de Rosalía, de Castelao e de Bóveda". Aos milleiros de persoas que loitaron por Galicia ao longo do tempo.
Esta iniciativa responde a reafirmar o "compromiso de loita" para que Galicia sexa "dona do seu futuro", dende a esperanza dun cambio real para construír democracia e "deixar atrás precariedade, emigración, agravios, discriminación". E todo isto, sinalan, dende a suma. Dende a diferenza, porque non existe unha única visión de país.
