O presidente da Deputación de Lugo: "Non somos o PP, no Goberno ou na oposición, defendemos o mesmo"

O presidente da Deputación de Lugo, Darío Campos Conde, mantivo este venres unha reunión co delegado do Goberno en Galicia, Javier Losada, na que o dirixente da institución provincial rexeitou ser "como o PP": "Indiferentemente se estamos no Goberno ou na oposición, continuamos a defender as mesmas reivindicacións para a provincia". Así o expresou, segundo informou a Deputación nun comunicado, tras un encontro no que ambos os representantes abordaron as "necesidades e reivindicacións" dos máis de 300.000 habitantes da provincia.

Ademais, Campos Conde trasladou a Javier Losada que "se deben reforzar os medios, tanto persoais como humanos, das forzas e corpos de seguridade do Estado". A continuación, apostou por que estas institucións se poñan "a disposición dos concellos para que dispoñan dos seus recursos, como son os remanentes ou a taxa de reposición". Pola súa banda, o delegado do Goberno expresou que é un día "de ledicia" para el por ir "a Lugo, unha provincia que ten un gran potencial". Así, reafirmou o "apoio" do Executivo central a proxectos como a alta velocidade ou que a conexión con Santiago de Compostela por autovía acabe nos tempos indicados, entre outros asuntos.

"Tal e como dixen cando tomei posesión como o delegado do Goberno de España, busco a proximidade, chegar a todos os recunchos de Galicia, así como escoitar aos cidadáns e tamén que os cidadáns escoiten o labor deste Goberno", manifestou Losada.