O galego Xabier Fortes dirixirá e presentará 'Los desayunos de TVE'

O proceso de catarse e renovación que vive RTVE nos seus Servizos Informativos, desde a chegada de Pedro Sánchez (PSOE) á Presidencia de España, tivo este venres outro importante capítulo: o nomeamento do xornalista galego Xabier como director e presentador de 'Los desayunos de TVE' a partir da próxima tempada, adiantou El País.

O xornalista, nado en Pontevedra en 1966, é un dos membros máis destacados do actual Consello de Informativos da cadea pública e substituirá a Sergio Martín, condutor e director do faladoiro matinal de contido político durante as dúas últimas tempadas.

Fortes, que recibiu o Premio Ondas en 2017, traballa actualmente no Centro Territorial de TVE en Galicia e está considerado un dos xornalistas máis comprometidos coa independencia e a pluralidade dentro de RTVE, mesmo denunciando situacións de manipulación e censura. De feito, foi unha das caras máis visibles dos 'Venres Negros' convocados polos traballadores da corporación para denunciar manipulacións e presións políticas no ente público (a iniciativa foi logo copiada polos traballadores da CRTVG).

O novo director de 'Los desayunos de TVE' comezou a traballar na cadea públca no ano 1990 na delegación de Pontevedra, da que saltou á de Santiago de Compostela, onde traballou como editor e presentador de informativos territoriais. Coñécido polo gran público como presentador de espazos de debates, entrevistas e especiais de varias convocatorias das eleccións autónomicas galegas, chegou a ser nomeado director do Centro Territorial de TVE en Galicia.

Posteriormente deu o salto a Madrid, onde foi director e presentador de 'La noche en 24 horas', até que foi cesado no mes de agosto do 2012.

Agora, regresa á capital para dirixir un dos espazos informativos máis importantes de TVE. O seu nomeamento é o primeiro cambio relevante entre os presentadores de informativos da canle pública, en pleno proceso de renovación.