A Xunta autoriza a apertura en Vigo dunha sala adicional do Casino da Toxa

A Xunta confirmou este martes a autorización para a apertura, en Vigo, dunha sala adicional do Casino da Toxa, "unha vez examinada toda a documentación requirida", segundo trasladaron fontes do Goberno autonómico.

Esta sala estará situada no Centro Comercial A Laxe, en Cánovas del Castillo, fronte ao peirao de transatlánticos, e a súa apertura será posible grazas á modificación da normativa autonómica sobre casinos de xogo. Co anterior regulamento, a apertura dunha sala en Vigo obrigaba ao peche do casino da Toxa, xa que só podía haber un casino por provincia.

A autorización para abrir esa sala adicional na cidade olívica "permitirá potenciar e xerar actividade económica directa e indirecta" en Vigo, segundo sinalou a Xunta.