A pola centola e o boi, para subministrar o mercado de Nadal
A Xunta abre este luns a campaña extractiva. A cota máxima de captura de cada unha destas especies será de 35 kg por barco e día, ao cal se engadirán 35 kg/día por cada tripulante enrolado e a bordo.
Por Galicia Confidencial | Santiago de Compostela | 11/11/2018 | Actualizada ás 19:08
A Consellería do Mar abre este luns, 12 de novembro. a campaña extractiva da centola e do boi nas provincias da Coruña e Pontevedra. Nas áreas que van da Guarda ata Cabo Corrubedo (na provincia de Pontevedra) e de Cabo Corrubedo ata Cabo Estaca de Bares (na provincia da Coruña), a frota con porto base nestas zonas e que se dedica á extracción destas especies pode calar os aparellos a partir das 00:00 horas desta madrugada e levar as especies á lonxa mañá luns.
A campaña deste crustáceo nestas dúas provincias prolongarase ata o inicio da veda do ano 2019, que se fixará a través do correspondente Plan de Xestión.
No caso da parte que vai Cabo Estaca de Bares ata o río Eo -incluíndo a Ría do Barqueiro-, na provincia de Lugo, a campaña iniciarase o 3 de decembro.
A cota máxima de captura de cada unha destas especies será de 35 kg por barco e día, ao cal se engadirán 35 kg/día por cada tripulante enrolado e a bordo.
Poderán participar na campaña todas as embarcacións con artes menores e con porto base en Galicia, así como aquelas que tendo porto base noutras comunidades autónomas, teñan permisos especiais de pesca para faenar nestas augas.
A centola e o boi son dous dos produtos estrelas coa chegada do Nadal é o aumento da demanda destes mariscos.
