Traballadores de Hércules de Armamento esixen estar nas reunións sobre o futuro da fábrica de armas
A representación dos traballadores lembra que hai 62 traballadores con contrato vixente e tamén que o Ministeroi de Defensa ignora ao comité de empresa.
Por E.P. | A CORUÑA | 11/01/2019 | Actualizada ás 18:34
Traballadores de Hércules de Armamento reclamaron participar nas reunións sobre o futuro da fábrica de armas que se celebren co Ministerio de Defensa, tras a reunión fixada para o día 16 en Madrid. Nun comunicado, o comité afirma que remitiu un escrito ao secretario de Estado de Defensa para trasladarlle "o malestar" entre os traballadores "pola súa exclusión" da reunión.
A representación social recorda que na fábrica hai nestes momentos un cadro de persoal integrado por 62 traballadores "con contrato en vigor e un comité de empresa constituído, que o Ministerio de Defensa ignora de xeito permanente".
Neste sentido, denuncian que o persoal se decatou polos medios de comunicación sobre unha reunión "con distintas administracións galegas, a Delegación do Goberno e antigos traballadores da anterior concesionaria".
Por outra banda, anuncian a convocatoria dunha concentración o día 15, ás 11,00 horas, ante a Delegación do Goberno, para demandar solucións ao Goberno, á Xunta e á dirección de Hércules de Armamento "para garantir os postos de traballo, o pago dos salarios e o mantemento da actividade produtiva na fábrica de armas".
