Os festivais galegos, finalistas dos premios Iberian Festival

FEST Galicia, a marca creada pola Xunta para os principais festivais galegos de música, concorre como finalista aos Iberian Festival Awards, convocados cada ano pola Asociación Portuguesa de Festivais de Música (Aporfest) e á que optan os principais eventos celebrados tanto en España como en Portugal.

FEST Galicia compite na candidatura de mellor activación de marca xunto a outras nove finalistas, entre os que se atopan campañas de firmas comerciais, algunhas mesmo en eventos galegos, como Super Bock no Son Rías Baixas e Estrela Galicia no Festival Sinsal.

No caso de FEST Galicia a valoración realizouse sobre o traballo desenvolvido o pasado verán nos seus 10 festivais galegos adheridos, a través de accións relacionadas coa sustentabilidade ambiental, a igualdade, a promoción da lingua e a difusión de programas destinados aos mozos.

Individualmente, algún dos festivais galegos adheridos a FEST Galicia tamén optan a distintos galardóns. O Resurrection Fest Estrella Galicia é finalista nas categorías de Best Major Festival, Best Touristic Promotion, Best Line-Up e Best Comunication.

O PortAmérica figura nas de Best Infraestructure e Best Live Performance polo directo de Vetusta Morla.

Tamén o Festival Ribeira Sacra está nomeado como Best Small xunto co Sinsal SON.

O WOS Festival foi seleccionado nas categorías de Best Indoor Festival e Best Touristic Promotion, e o Atlantic Fest é candidato como Best Cultural Programme.

O certame tamén seleccionou como finalistas outros festivais galegos, non incorporados a FEST, como o Caudal Fest, Ou Son do Camiño, o Festival dos Eidos e o FIV de Vilalba.

Os finalistas son escollidos polo público a través dunha votación 'en liña' e un xurado especializado escollerá aos gañadores, que se comunicarán nunha gala o 13 de marzo no Teatro Afundación de Vigo.