O comité de Ferroatlántica traslada aos grupos parlamentarios o seu temor pola "previsible" venda das instalacións

O comité de Ferroatlántica Cee, Dumbría e Centrais Hidroeléctricas mantivo este venres reunións co catro grupos do Parlamento de Galicia para trasladarlle a súa "preocupación" pola "previsible" venda do complexo industrial e dos saltos de auga. Así, tamén lles reclamou que esixan á Xunta que "faga valer as cláusulas concesionales para evitar esta segregación encuberta".

A sección sindical da Confederación Intersindical Galega (CIG) advertiu que con esta operación, á que se sumará a venda de Fertibeira, o Grupo Villar Mir "pretende afrontar parte da débeda millonaria adquirida noutros sectores do grupo, nomeadamente pola construtora OHL".

"Os últimos movementos realizados na empresa apuntan a que Ferroatlántica pretende vender en conxunto as fábricas e as centrais a Ferrovial para despois, percorrendo a subterfuxios legais, quedar coa produción dos fornos mentres Ferrovial explota as centrais", denunciou o portavoz da CIG na compañía, Alfonso Mouzo.

Esta manobra, segundo Mouzo, suporía unha segregación encuberta "ilegal", "xa que os termos da concesión vinculan especificamente a produción de enerxía coa de ferroaleación", subliñou a organización sindical.

"De feito, as centrais construíronse para abastecer de electricidade as plantas, non para facer negocio coa enerxía. Ademais, de consumarse esta ilegalidade, estar a pór en serio risco a viabilidade das fábricas de Cee e Dumbría e o mantemento dos empregos", lamentou.

RESPONSABILIDADE

Desde a sección sindical da CIG apelaron á "responsabilidade" do Goberno galego xa que, ao seu xuízo, "ten as competencias sobre as explotacións hidroeléctricas e da mina de seixo adxudicadas a Ferroatlántica". Neste sentido, lembraron que hai dous anos a Xunta lle concedeu a concesión de tres novas centrais "que a compañía explota sen crear nin un só posto de traballo".

O vindeiro martes, Ferroglobe (matriz de Ferroatlántica) presentará os resultados do primeiro trimestre, polo que os traballadores "temen que a empresa aproveite esta data para facer o anuncio da venda das fábricas e as centrais da Costa da Morte.

AUTOCONSUMO

Neste sentido, En Marea propuxo dedicar ao autoconsumo das factorías de Cee e Dumbría a produción eléctrica das centrais de Ferroatlántica.

Segundo expuxo o deputado Francisco Casal, esixir a Ferroglobe que utilice a produción eléctrica das centrais hidráulicas de Ferroatlántica para autoconsumo, "motivo polo cal ten a concesión", levaría as factorías a ser as "máis competitivas do mundo".