VOTA | Estás de acordo co nomeamento de Carvalho Calero como homenaxeado no Día das Letras Galegas 2020?

A Real Academia Galega (RAG) dedicará o Día das Letras Galegas de 2020 a Ricardo Carvalho Calero, considerado o grande impulsor do reintegracionismo (corrente que avoga por integrar o galego no mundo lusófono mediante unha nova normativa ortográfica alternativa á oficial da RAG).

Ricardo Carvalho Calero | Fonte: Artabra Dixital

Criticado no seu día por defender estas posicións, durante moito tempo, a súa figura foi tan apreciada como deostada pola súa defensa do reintegracionismo e a súa candidatura, durante anos, foi amplamente debatida. Agora, o nomeamento de Carvalho Calero é visto con ledicia desde a Associaçom Galega da Lingua (AGAL), xa que, por primeira vez, se recoñecen e normalizan institucionalmente os posicionamentos reintegracionistas. Á par, desde a RAG, o seu presidente, Víctor Freixanes, recoñeceu que a aceptación da súa candidatura é "indiscutible", pero tamén dixo que a postura reintegracionista é "unha cuestión menor dentro da biografía de Carvalho Calero" que "parece que durante moito tempo embazou a súa figura".

Aberto de novo o debate sobre a oportunidade, ou non, de que a lingua galega se achegue máis á lusofonía mediante as teses reintegracionistas, GC quere coñecer a opinión dos seus lectores sobre o nomeamento de Carvalho Calero como homenaxeado no Día das Letras Galegas 2020.