Santiago inicia unha campaña contra a explotación sexual
O programa Vagalume asistiu o ano pasado en Compostela a 51 mulleres e conseguiu que 35 "se encamiñasen ao abandono da explotación sexual".
Por E.P. | SANTIAGO DE COMPOSTELA | 17/10/2019 | Actualizada ás 15:02
Aproveitando a celebración este venres do Día contra Trata, o Concello de Santiago porá en marcha unha campaña específica para concienciar sobre a loita contra a explotación sexual e para difundir os recursos municipais dos que dispoñen as vítimas.
Así o explicou a concelleira de Igualdade de Santiago, Noa Díaz, que presentou a campaña que se desenvolverá baixo a lema 'Se compras sexo, non vales nada'.
En rolda de prensa, a edil asegurou que a trata afecta en todo o mundo a 24 millóns de persoas e que este "vergoñoso delito" é, ademais, o terceiro negocio "máis lucrativo do planeta", tras o tráfico de armas e de drogas.
Fronte a iso, e para buscar a concienciación social, o concello decidiu sacar á rúa unha campaña de información sobre "a forma máis habitual de trata", a explotación sexual, que ten na súa "práctica totalidade" como vítimas a mulleres e nenas.
A iniciativa, dixo, busca "xerar conciencia" e "crear unha reflexión entre os veciños" sobre esta "forma de escravitude" que "afecta" os composteláns "de preto", aínda cando "non se vexa" pola clandestinidade da actividade.
CARPA NO TOURAL
A Praza do Toural de Santiago acollerá este venres unha carpa informativa na que se proporcionará información e 'merchandising' sobre esta loita, e que se aproveitará para difundir os recursos dos que dispón o concello para apoiar s vítimas a través do Centro de Información á Muller.
Santiago mantén activo un convenio con Cáritas para, a través do programa Vagalume, asistir a mulleres neste tipo de situacións. O programa atendeu o pasado ano no municipio a 51 mulleres, das que 35 puideron "encamiñar" a súa vida cara a "o abandono da explotación sexual".
O perfil de persoa asistida é o dunha muller nova, de entre 25 e 30 anos, e estranxeira. Ademais nacionalidades como República Dominicana ou Brasil, os expertos apuntan ao auxe de vítimas procedentes de Venezuela.
